میر و جڤاتا ڕۆحانیا ئێزدییان: کۆمکوژییا شنگالێ هێشتا بەردەوامە
دهۆک-KDP.info- میر و جڤاتا ڕۆحانییا ئێزدییان د دەربارەیی کۆمکوژییا شنگالێ دا ئەوا ل ساڵا ٢٠١٤ـی دا هاتییە ئەنجامدان، ڕاگەهاندن ب مخابنی هێشتا ئەڤ کۆمکوژییە بەردەوامە.
دەقێ پەیاما میر و جڤاتا ڕۆحانییا ئێزدییان:
ب دلەكی پری شوات و خەمگین , ب ئێش و ژانێن بەردەوام , و ب برینەكا كوورا هەردەم بریندار , و ب هەست و ناخ و دەروونەكی مە نە ئارام , سالرۆژا جینۆسایدا ئێزدیان ل عیراقێ ل بیر دئینین , كو د رۆژەكا وەك ئیرۆدا بەری هەفت سالان , پیلانگێرێن دژی مرۆڤایەتیێ و ژیانێ برێكا كاربەدەست و كرێگرتیێن خۆ یێن هەلگرێن هزرێن پاشڤەمایی و رادیكال , دوژمنێن ئاشتی و ئازادای و پێشكەفتنێ , دوژمنێن بنەمایێن ژیانا سەردەم و پێكڤەژیانێ , دەستێن خۆ یێن پری گەمار درێژكرنە سە ر ئاخەكا پیرۆزا مللەتێ مە ل شنگالا خۆراگر (كەلەها عەگید و مێرخاسا) و چەندین دەڤەرێن دیتر . و دەست ب درەندەترین كریارێن هۆڤانە كرن بەرامبەر پێكهات و ئۆلەكا كەڤن و رەسەنا ئاخا میزۆبۆتامیا , و د ئەنجامدا پر ئێشترین و مەزنترین فەرمان و تاوانێن دژی مرۆڤایەتیێ ئەنجامدان , هەر ژ كوشتن و ئێخسیركرن و مالوێرانكرن و ئاوارەكرن و هەرفاندنا نیشان و مەزارگەهێن پیرۆز و تەپەسركرن وسەبیكرنا عەزیزترین دایك و خۆشكان ل پێش چاڤ و بێ دەنگبوونا حكومەتا عیراقێ وجڤاكا نێڤدەولەتی ڤە , بمخابنی و ب دلەكی خەمگین دبێژین تا نها چارەنڤیسێ گەلەك ژ ئەوان قوربانیان نەی دیارە و د بێ سەروشوێنن , لێ ناهێتە ڤەشارتن ئەڤ فەرمان وەك لاپەرەكا رەش هەردەم دێ مینت د لاپەرێن دیرۆكا جڤاكا نێڤ دەولەتی و كەسانێن دەست د ڤێ كۆمكوژیێ دا هەین و دیرۆك ژی دلۆڤانیێ نابەت ب زولم و زۆرداریا وەها مەزن ل بێ گونەهیا مللەتەكی ئاشتیخوازی بێ دەستهەلات , لەورا ب بیرەوەریا هەفت سالان یا كۆمكوژیا ئێزدیان و ئەنجامدانا مەزنترین فەرمان ل چەرخێ (بیست و ئێكێ) كو ب مخابنی ڤە دبێژین تا نها یا بەردەوامە , لێ ب رێك و شێوازێن جودا جودا .
هەر ب ڤێ بیرەوەریا دلتەزین و خەمگین و ناخهەژین سەرێ خۆ دچەمینین:
- هەمبەر قوربانی و مالباتێن قوربانیان...
- هەمبەر دایكێن دلشوات ...
- هەمبەر گەنجێن نوهاتی و ب گەنجاتی ببوون قوربانی ...
- هەمبەر زارۆكێن خۆشی ژ زاركینیا خۆ نەدیتین ...
- هەمبەر كچێن ب هیڤی و ئۆمێد و خەونێن خۆ نەگەهشتین ...
- هەمبەر كالەمێرێن سەرێ خۆ ل رێیا ئۆلا خۆ یا پیرۆز داین ...
گەلێ مە یێ ئێزدی یێ خۆراگر ...
ئۆلا مە , هەروەها بابكالكێن مە ئەم هۆسا پەروەردەكرینە كو رێزێ ل قەنجیان بگرین , لەورا دناڤ مەدا گۆتنەك هەیە دبێژت : (( ئەگەر تە قەنجیەك ب ئێكی كر ل بیرێ نەهینە ... ئەگەر ئێكی قەنجیەك ب تەكر ژبیرنەكە ))
ژبەرهندێ وەكو پەیاما میرێ ئێزدیان و مەجلسا رۆحانی و بناڤێ تەڤایا ئێزدیان سۆپاسدار و قەردارێن هەلویستێ جوامێرانە یێ گەلێ كوردستانێ وتەقسیر نەكرنا حكومەتا هەرێما كوردستانێ نە , ئەوێن دەرگەهێن مالێن خۆ ڤەكرین , ئەوێن پاریێ خۆ ل سەر مە دابەشكرین , ئەوێن دەرگەهێن مزگەفت و كەنیسا ل مە ڤەكرین و حەواندین و دەستێ هاریكاریێ درێژكرین ل گەرماتیا فەرمانێ و رۆژێن تەنگاڤدا .
- هەروەها سۆپاس ژبۆ رۆل و بەرخودانی و قۆربانی و خۆ نەچەماندنا عەگید و مێرخاسێن چیایێ شنگالا خۆراگر د وان رۆژێن دژواردا كو سمبولا مێرخاسیێ و بەرخودانیێ بووینە .
- هەروەها سۆپاس ژبۆ حكومەتا هەرێما كوردستانێ و رۆلێ وێ د رزگاركرنا رەڤاندیێن ئێزدی ژ كچ و ژن و زارۆك و گەنجان .
- دیسان دبێژین رێز و سۆپاس ژبۆ ئەوان وەلات و هەرێم و دەزگەهێن نەتەوێن ئێكگرتی ئەوێن هەڤخەمێن مە بووین و كەیسا ئێزدیان وەك جینۆساید ل پەرلەمان و دەزگەهێن خۆ یێن تەشریعی پەسەندكرین , و ئاوارە و كۆچبەرێن مە ل ناڤا جەرگێ خۆدا حەواندین و مافێ ئینسایەتێ پێ بەخشین .
- دیسان سۆپاس ژبۆ هەر پێكۆل و بزاڤ و پێنگاڤەكا هاتی هاڤێتن تا نها ژبۆ ناساندنا دۆزا ئێزدیان ل هەموو مەحفلێن نافخۆی و هەرێمی و جیهانی .
لێ ئەڤە وێ چەندێ ناگەهینت كو برینێن مە ب تەمامەتی دەرمان بووینە , و ئەڤ بابەت ب داویی هاتییە , بەلكو ئێش و ژانێن مە دبەردەوامن و دڤێ رۆژێ دا ئەڤ ئێش و ژان پتر دئازرێن و دكەلن , لەورا بناڤێ مەجلسا رۆحانی یا ئێزدیان داخوازێ ژ حكومەتا هەریمێ و عیراقێ و جڤاكا نێڤ دەولەتی و جهێن پەیوندیدار دكەین :
- چارەنڤیسێ هەزاران ئێزدیێن رەڤاندی بهێنە خویاكرن .
- رێكەفتنا شنگال بهێتە جێ بەجێكرن و ئارامی و سەقامگیری بهێتە پەیداكرن داكو پەریشانیا ئاواران ب داویی بهێت ل كەمپا , و ب سەربلندی ڤەگەرێن سەر جه و وارێن خۆ و ژیانا وان ئاسایی ببت .
- دیسان ژ جهەتێن ناڤبری دخوازین كو پوتەدانەكا مەزن ب رزگاربوویان بهێتە دان ژ لایێ مادی و مەعنەوی ڤە و بهێنە قەرەبۆكرن و تەڤایا مافێن وان بدەستڤە بهێن .
- هەروەها تاوانبارێن كۆمكوژیێ ب توندترین سزا بگەهنە سزایێن خۆ .
- داخوازا ژ حكومەتا عیراقێ و جڤاكا نێڤ دەولەتی دكەین كو پتر بهێنە سەر خەتێ و هەول و بزاڤێن خۆ بهێزتر بكەن ژبۆ ناساندنا كەیسا ئێزدیان ل دادگەهێن نێڤ دەولەتی وەكو جینۆساید .
- دیسان داخوازێ ژ تەڤایا ئێزدیان ل سەرانسەری جیهانێ دكەین كو ئەڤ رۆژا دلشوات ببتە پالدەر ژبۆ تفاقێ و ئێكرێزیێ ژبەركو تاكە رێك ژبۆ مللەتێ تەنها مە تفاق و تەبایی یە , هەروەكو د قەول و سەبەقێن مە یێن پیرۆز دا هاتی دەمێ دبێژت :
برمە دیوانا ئیلاهی یە
من ل وێ دیتن خۆشی و شاهییە
سەرێ هەموویێ تفاق و تەبایی یە
ل داویێ ژی دبێژین وەكو میر و جڤاتا رۆحانی دێ بەردەوامبین ل سەر گەهاندنا دەنگێ ئێزدیان بۆ جیهانێ ب رێیا حكومەتان و سەفاراتا و قونسلیا و رێكخراوێن جیهانی یێن مافێ مرۆڤا پێخەمەت كەیسێن ئێزدیان , و چارەسەركرنا ئێش و ئازار و نەخۆشیان , و بدەستڤە ئینانا مافێن مللەتێ خۆ پێخەمەت دووبارەنەبوونا كارەساتێن دیترێن جەرگبر ...
سەربەرزی و نەمری بۆ قوربانیێن ڤێ كارەساتێ و جهێ وان بەهشتا بەرینا ئەزدایێ مەزن بت و هەزار رەحمە ل جانێ وانێ پاك و پاقژبت و خودایێ مەزن سەبر و هەدارێ بدەت مالباتێن قوربانیان و مە و تەڤایا ئێزدیان ,
و سەرشۆربن تاوانبار و دەستێن د كریارا جینوسایدكرنا ئێزدیان دا هەین .
کــاروان بـاعەدری
