باژێرڤانیا دھۆکێ ب کوژمێ پتری ٦٨ ملیار دیناران د ئەڤ سالە دا پرۆژە ئەنجامداینە
دھۆک –KDP.info- سەرۆکاتیا باژێرڤانیا دھۆکێ ئەڤرۆ رۆژا ٨/٧/٢٠٢١ ئامارێن خوە یێن شەش ھەیڤێن بۆری یێن سالا ٢٠٢١ راگەھاندن و تێدا دیار کر کو د ڤی دەمی دا وان پرۆژە ب کوژمێ پتری ٦٨ ملیار دیناران ل سنوورێ باژیرَڤانیێن خوە ئەنجامداینە.
ئیسماعیل مستەفا، بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ د پرێس کۆنفرانسەکی دا ئاشکرا کر کو ھەر ژ رۆژا ١/١/٢٠٢١ ھەتا رۆژا ٣٠/٦/٢٠٢١ێ (٣٧) پرۆژە ل سنوورێ سەرۆکاتیا باژێرڤانیا دھۆکێ ب کوژمێ ٦٨ ملیار و ٨٥٦ ملیۆن دینار ھاتینە ئەنجامدان و نوکە کار د چێکرنا ھندەک ژوان پرۆژان دا ھێشتا یێ بەردەوامە، ئێک ژ وان پرۆژان یێ وەزارەتا باژێرڤانی و گەشتوگۆزار یا حکومەتا ھەرێما کوردستانێ یە کو ل جادا بارزان یا د ناڤ باژێرێ دھۆکێ دا دھێتە ئەنجامدان و ئەڤ پرۆژە نوکە ب رێژا ٩٣% ب دووماھی ھاتیە و گۆت: "بەھرا پتریا پرۆژێن د ھەیڤێن بۆری یێن ئەڤ سالە دا ھاتینە ئەنجامدان ڤەکرن و قێرکرنا جادان بوون، ھەروەسا دابینکرنا کەرەستێن پێدڤی بوون بۆ کارگەھا کاشێ یا قێری بۆ قێرکرن و سەخبێریا جادێن د ناڤ سەنتەرێ باژێرێ دھۆکێ دا زێدەباری ڤێ چەندێ د ھەمان دەم دا چەندین کەرەستێن پێدڤی بۆ باخچان ژی ھاتینە دابینکرن".
ناڤھاتی ئاماژە دا وێ چەندێ کو د شەش ھەیڤێن بۆری یێن ئەڤ سالە دا پتری ٧٠٠ داران و ٢٤ ھزار و ٤٢٦ گۆلێن ھەردەم و ١٥٥ ھزار گۆلێن وەرزی و ھزار و ٥٠٦ کگم فریزی ژ لایێ رێڤەبەریا ئەندازەیا پارکان یا سەر ب سەرۆکاتیا باژێرڤانیا دھۆکێ ڤە د ناڤ سەنتەرێ باژێرێ دھۆکێ دا ھاتینە چاندن و چەندین کار و چالاکیێن دی ژی ژ لایێ ھەمان رێڤەبەری ڤە ھاتینە ئەنجامدان.
بەرپرسێ پەیوەندی و راگەھاندنێ ل سەرۆکاتیا باژێرڤانیا دھۆکێ خویا کر کو رۆژانە نێزیکی ٤٦٨ تەنێن بەرمایکان ل سنوورێ سەرۆکاتیا باژیرَڤانیا دھۆکێ دھێنە راکرن سەرەرایی ڤێ چەندێ د شەش ھەیڤێن بۆری یێن ئەڤ سالە دا چەندین ھەوێن پاقژکرنێ د ناڤ سەنتەرێ باژێرێ دھۆکێ دا و ئەو جھێن سەیرانی دچنێ ھاتینە ئەنجامدان و گۆت: "د ھەمان دەم دا ٥٣٧ دەستووریێن ئاڤاھیان ژ لایێ باژێرڤانیا رۆژھەلات و رۆژئاڤا یێن سەر ب سەرۆکاتیا باژێرڤانیا دھۆکێ ڤە ب ھاتینەدان، ھەروەسا ٢٥٧ دەستووریێن ئاکنجیبوونێ و ٥٥ مۆلەتێن بازرگانی و شەش مۆلەتێن خزمەتگۆزاری و ١٦٣ مۆلەتێن جوراوجور ٥٦ مۆلەتێن پیشەسازی ژی ھاتینەدان".
رێوار محەمەد رەشید
