راگەیاندنی پارتی (٢١)ەمین ساڵیادی دامەزراندنی خانەی موكریانی پیرۆز دەكات

هەولێر-KDP.info- دەزگای رۆشنبیری و راگەیاندنی پارتی دیموكراتی كوردستان، بە بۆنەی (٢١)ەمین ساڵیادی دامەزراندنی خانەی موكریانی، پەیامێكی پیرۆزبایی ئاراسته‌ی بەڕێوەبەر و کادیر و كارمەندانی خانەی موكریانی بۆ چاپ و بڵاوكردنەوە كرد.

دەقی پەیامی دەزگای رۆشنبیری و راگەیاندنی پارتی دیموكراتی كوردستان:   

بەڕێزان/ بەڕێوەبەر و کادیر و كارمەندانی خانەی موكریانی بۆ چاپ و بڵاوكردنەوە

ئەمڕۆ (٢١) ساڵ بەسەر دامەزراندنی خانەی موكریانی تێدەپەڕێت، بەو بۆنەیەوە پیرۆزباییەكی گەرمتان لێدەكەین و،  هیوادارین بۆ ساڵی داهاتوو  هەنگاوی باشتر و زیاتر بنێن لە كارنامە و پلانی كاركردنتان.

خانەی موكریانی بۆ چاپ و بڵاوكردنەوە، بە پێی پلانێكی رێكوپێك و لەو ماوەی چاپكردن و بڵاوكردنەوەی بەرهەمەكانی رۆڵێكی گرنگی هەبووە لە دەوڵەمەندكردنی كتێبخانەی كوردیمان و هاریكاریكردنی بەبێ جیاوازی نووسەران و رۆشنبیران و ئەدیبان.

لەلایەكی دیكەوە خانەی موكریانی لەچوارچێوەی ئەو بوارە رۆشنبیریی و مەعریفیەدا جێدەستی دیار و بەرچاوە وەك پرۆژەیەكی رۆشنبیریی و كولتووری، كە بەسەدان بەرهەم و كتێبی لە بوارە جیاجیاكانی مەعریفی و كولتووری بەگشتی  لەوانەش مێژوویی، ئەدەبی، جڤاكی، پەرەپێدانی مرۆیی و فەرهەنگی چاپكردووە، بۆیە ئەو پرۆژە و هەوڵ و ماندووبوونەتان مایەی سوپاس و شانازیە.

بەو بۆنەیەوە جارێکی دیکە پشتیوانی تەواوی خۆمان بۆ هەوڵ و كۆشش و كارەكانتان دووپات دەكەینەوە و ئومێدی بەردەوامیتان بۆ دەخوازین..

 

دەزگای رۆشنبیری و راگەیاندنی پارتی دیموكراتی كوردستان

٥ـی٧ـی٢٠٢١