پارێزگەرێ دھۆکێ: دەست ب رێکارێن سەربەخوەبوونا ئیدارەیا قەزا زاخۆ ھاتیەکرن
دھۆک-KDP.info- ب بریارا سەرۆکێ حکومەتا ھەرێما کوردستانێ ئەڤرۆ رۆژا ١٦/٦/٢٠٢١ بەشێ پۆلیسێن قەزا زاخۆ ژ رێڤەبەریا پۆلیسێن پارێزگەھا دھۆکێ ھاتە جوداکرن و ژ نوکە وێڤە دێ وەکو رێڤەبەریەکا سەربەخوە ب سەر رێڤەبەریا گشتی یا پۆلیسێن ھەرێما کوردستانێ ڤە کارێ خوە ئەنجام دەت، ھەروەسا کار بۆ سەربەخوەیا ئیدارەیا قەزا زاخۆ ژی یێ بەردەوامە و پێنگاڤێن باش بۆ ڤێ مەرەمێ ھاتینە ھاڤێتن.
عەلی تەتەر، پارێزگەرێ دھۆکێ د پرێس کۆنفرانسەکی دا ئاشکرا کر کو پشتی ئەڤرۆ بەشێ پۆلیسێن قەزا زاخۆ ژ رێڤەبەریا پۆلیسێن پارێزگەھا دھۆکێ ھاتیە جوداکرن ل دەمەکێ نێزیک چەندین رێڤەبەریێن دی ل قەزا ناڤھاتی دێ ئاستێ وان ھێتە بلندکرن و بنە رێڤەبەریێن گشتی وەکو رێڤەبەریا (پەروەردێ و ساخلەمیێ و چاندنێ و ئەوقافێ) ئەڤە ژی ھەمی د چارچۆڤێ وی کاری دایە بۆ وێ چەندێ دەڤەرا زاخۆ ببیتە ئیدارەیەکا سەربەخوە و گۆت: "ھەر ژ دەستپێکا دەستبکاربوونا من وەکو پارێزگارێ دھۆکێ جەنابێ سەرۆکێ حکومەتا ھەرێما کوردستانێ گەلەک یێ رژد بوو و دووپاتیەکا گەلەک باش یا ل سەر وێ چەندێ کری کو ئیدارەیەکا سەربەخوە ب دەڤەرا زاخۆ بھێتە دانان".
ناڤھاتی ئاماژە دا وێ چەندێ کو مخابن بەری کو کارەکێ باش بۆ سەربەخوەبوونا ئیدارا دەڤەرا زاخۆ بھێتەکرن ئەم وەکو ھەمی جیھانێ تووشی قەیرانەکا گەلەک مەزن بووین ئەو ژی بەلاڤبوونا ڤایرۆسێ کۆرۆنایێ بوو و بەھرا پتریا وان کارێن کو پێدڤی بۆ بھێنە ئەنجامدان ھاتنە راگرتن و کارتێکرنەکا گەلەک مەزن ل پرۆژە و بەرنامێن مە ھاتەکرن، بەلێ سەرەرایی ڤێ چەندێ ھەمیێ نوکە کار دچێکرنا پرۆژان دا ل قەزا زاخۆ و قەزایێن دی ژی یێن پارێزگەھا دھۆکێ یێ بەردەوامە و چەندین پرۆژێن نوی ژی دێ ھێنە چێکرن و گۆت: "ل دەمەکێ نێزیک ئەم دێ گوھۆرینێن ل دەڤەرا زاخۆ دھێنە ئەنجامدان بینین و وان مزگینیان ددەمێ وان دا دێ راگەھینین".
رێوار محەمەد رەشید
