بەربژارێن باژێرڤانیان ژ لایێ جڤاتا پارێزگەھا دھۆکێ ڤە ھاتنە پەسەندکرن
دھۆک-KDP.info- جڤاتا پارێزگەھا دھۆکێ ئەڤرۆ رۆژا ١٦/٦/٢٠٢١ کۆمبوونا خوە یا ئاسایی یا ژمارە ١١٨ ل دۆر پەسەندکرنا بەربژارێن باژێرڤانیێن پارێزگەھا دھۆکێ ئەنجام دا و تێدا ٤٨ بەربژار ھاتنە پەسەندکرن.
فەھیم عەبدوللا حەمۆ، سەرۆکێ جڤاتا پارێزگەھا دھۆکێ د پرێس کۆنفرانسەکی دا ئاشکرا کر کو پشتی چەندین جاران پرۆژێ بەربژارێن باژێرڤانیان ژ لایێ جڤاتا پارێزگەھا دھۆکێ ڤە ژ بەر تێبینی و پێشنیارێن ئەندامێن جڤاتێ ھاتیە زڤراندن، ئەڤرۆ ب زۆرینەیا دەنگێن ئەندامێن جڤاتا پارێزگەھا دھۆکێ پشتی ئەو ھەمی تێبینی ژ لایێ رێڤەبەرێ گشتی یێ باژێرڤانیان ل پارێزگەھا دھۆکێ و ستافێ وی ڤە ھاتینە چارەسەرکرن ٤٨ بەربژارێن جڤاتا باژێرڤانیێن دھۆکێ ھاتنە پەسەندکرن.
ناڤھاتی ئاماژە دا وێ چەندێ کو د کۆمبوونا ئەڤرۆ دا ژمارەکا ئەندامێن جڤاتا پارێزگەھا دھۆکێ پێشنیارەک ل سەر وێ چەندێ کربوو کو دانوستاندن ل دۆر دووبارە ڤەکرنا ھۆلێن تازیا ل پارێزگەھا دھۆکێ بھێتەکرن، بەلێ ئەڤ بابەتە یێ گرێدایی لیژنا بلند یا بەرھەنگاربوونا ڤایرۆسێ کۆرۆنایێ یە ل پارێزگەھا دھۆکێ و دڤێت ئەو بڕیارێ ل دۆر ڤێ چەندێ بدەن، ژ بەر کو بڕیارا داخستنا ھۆلێن تازیان ھەر ژ لایێ لیژنا ناڤھاتی ڤە ھاتبوو دان.
رێوار محەمەد رەشید
