جڤاتا پارێزگەھا دھۆکێ دانوستاندن ل دۆر یاسایا نوی یا ھەلبژارتنێن عیراقێ کر

دھۆک-KDP.info- جڤاتا پارێزگەھا دھۆکێ ئەڤرۆ رۆژا ١٤/٦/٢٠٢١ کۆمبوونا خوە یا ئاسایی یا ژمارە ١١٧ ب ئامادەبوونا ئۆفیسا دھۆک یا کۆمسیونا بلندا سەربەخوەیا ھەلبژارتنان ل عیراقێ ب مەرەما ھەماھەنگی و دانوستاندنێ ل دۆر یاسایا نوی یا ھەلبژارتنێن عیراقێ ئەنجام دا.
فەھیم عەبدوللا حەمو، سەرۆکێ جڤاتا پارێزگەھا دھۆکێ د پرێس کۆنفرانسەکی دا ئاشکرا کر کو ناڤەرۆکا کۆمبوونا ئەڤرۆ یا جڤاتا پارێزگەھا دھۆکێ ل دۆر ئامادەکاریێن ئۆفیسا دھۆک یا کۆمسیونا بلندا سەربەخوەیا ھەلبژارتنان ل عیراقێ و شرۆڤەکرنا یاسایا نوی یا ھەلبژارتنان ل عیراقێ بوو و د ھەمان کۆمبوون دا دووپاتی ل ھەماھەنگیا جڤاتا پارێزگەھا دھۆکێ و ئۆفیسا ناڤھاتی ھاتەکرن ب مەرەما سەرخستنا پرۆسا ھەلبژارتنێن داھاتی ل عیراقێ.
خالد عەباس، رێڤەبەرێ گشتی یێ ئۆفیسا دھۆک یا کۆمسیونا بلندا سەربەخوەیا ھەلبژارتنان ل عیراقێ د ھەمان پرێس کۆنفرانس دا ئاشکرا کر کو ئەڤرۆ مە دانوستاندن ل دۆر برگێن یاسایا ژمارە نەە یا ھەلبژارتنان ل سالا ٢٠٢٠ کر کو ئەڤ یاسایە یا جودایە ژ یاسایێن دی و جڤاتا پارێزگەھا دھۆکێ ژی نوونەراتیا خەلکێ پارێزگەھا دھۆکێ دکەت دڤێت ئاگەھداریەکا باش ل دۆر ھەمی برگێن ڤێ یاسایێ ھەبیت ئەو ژی بەلاڤکرنا پارێزگەھا دھۆکێ ل سەر سێ بازنەیان کو ل ھەلبژارتنێن بۆری یێن عیراقێ پارێزگەھا دھۆکێ بتنێ ئێک بازنە بوو  و گۆت: "د ڤێ کۆمبوونێ دا بەحسێ ھەمی وان بەرھەڤیێن ئۆفیسا مە ھاتنەکرن یێن کو بۆ ھەلبژارتنا جڤاتا نوونەرێن عیراقێ ھاتەکرن یێن کو ژڤانە ل رۆژا ١٠/١٠/٢٠٢١ بھێنە ئەنجامدان".
رێوار محەمەد رەشید