ئەڤرۆ دەست ب چێکرنا پرۆژێ ئەندەرپاسا سێمێلێ ھاتەکرن
دھۆک-KDP.info- رێڤەبەرا رێک و پرا ل پارێزگەھا دھۆکێ ئاشکرا کر کو د چارچۆڤێ وان پرۆژێن ستراتیژی یێن د کابینا نەھێ یا حکومەتا ھەرێما کوردستانێ دا ل پارێزگەھا دھۆکێ دھێنە ئەنجامدان ئەڤرۆ رۆژا ١٤/٦/٢٠٢١ دەست ب چێکرنا ئەندەرپاسا قەزا سێمێلێ یا سەر ب پارێزگەھا دھۆکێ ڤە ھاتەکرن.
خەدیجا محەمەد ئەحمەد، رێڤەبەرا رێک و پرا ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو پشتی ھەمی قووناغێن دیزاینێ بۆ چێکرنا پرۆژێ ئەندەرپاسا قەزا سێمیلێ ب دووماھی ھاتین ئەڤرۆ دەست ب چێکرنا پرۆژێ ناڤھاتی ھاتەکرن و گۆت: "ئەڤ پرۆژە دێ ژ لایێ کۆمپانیەکا ناڤخۆیی ڤە ھێتە بجھئینان و چار ملیار و ٢١٩ ملیۆن دینار بۆ ڤی پرۆژەی ل سەر دەمێ کابینا نەھێ یا حکومەتا ھەرێما کوردستانێ ژ لایێ وەزارەتا ئاڤەدانکرن و ئاکنجیبوونێ یا حکومەتا ھەرێمێ ڤە ھاتینە تەرخانکرن".
ناڤھاتیێ ئاماژە دا وێ چەندێ کو ئەڤ پرۆژە نەبتنێ دێ خزمەتا خەلکێ پارێزگەھا دھۆکێ کەت، بەلکو دێ خزمەتا ھەموو خەلکێ ھەرێما کوردستانێ و عیراقێ کەت ژ بەر کو رێیا دھۆک - زاخۆ رێیەکا ستراتیژیێ یە و ئەڤ ئەندەرپاسە ژی دێ ل سەر ڤێ رێیێ ھێتە چێکرن و گۆت: "ئەڤ پرۆژە دێ بیتە ئەگەرێ وێ چەندێ ژی کو ھاتنوچوونا ترۆمبێلان ل وێ جادێ ب ساناھی تر لێ بھێت و روودانێن ھاتنوچوونێ ژی کێمتر لێ بھێن ژ بەر کو بەری نوکە چەندین روودانێن دلتەزینێن ھاتنوچوونێ ل جھێ ڤێ ئەندەرپاسێ پەیداببوون و چەندین کەسان د ڤان روودانان دا گیانی خوە ژ دەست دابوو".
رێوار محەمەد رەشید
