٢٠ ھزار کەسان ل دھۆکێ ناڤێن خوە بۆ سەر سندوقێن دەنگدانێ تۆمارکرینە
دھۆک-KDP.info- بەرپرسێ ئۆفیسا دھۆک یا کۆمسۆنا بلندا سەربەخوەیا ھەلبژارتنێن عیراقێ ئاشکرا کر کو ھەتا نوکە ٢٠ ھزار کەسان ل پارێزگەھا دھۆکێ ناڤێن خوە ب رێیا ئۆنلاین بۆ سەر سندوقێن دەنگدانێ تۆمارکرینە و وان بۆ ڤێ مەرەمێ بتنێ پێدڤی ب ١٠ ھزار کارمەندان ھەیە.
خالد عەباس، بەرپرسێ ئۆفیسا دھۆک یا کۆمسۆنا بلندا سەربەخوەیا ھەلبژارتنێن عیراقێ بۆ مالپەرێ فەرمیێ پارتی دیموکراتی کوردستان دیار کر کو تۆمارا بایۆمەتری ھەتا رۆژا ١/٥/٢٠٢١ یا بەردەوام بوو و ٧٤% ژ خەلکێ پارێزگەھا دھۆکێ ب تۆمارا ناڤھاتی ھاتنە تۆمارکرن کو پارێزگەھا دھۆکێ ب رێژا دووێ دھات ل سەر ئاستێ عیراقێ و گۆت: "ھەتا نوکە ٩٢% ژ خەلکێ پارێزگەھا دھۆکێ کارتێن خوە یێن بایۆمەتری یێن وەرگرتین".
ناڤھاتی ئاماژە دا وێ چەندێ کو بۆ ھەلبژارتنێن داھاتی یێن عیراقێ ٣٣ بەربژار ل پارێزگەھا دھۆکێ ھەنە ژ ڤی سەرجەمی ناڤێن ٢٠ بەربژاران ژ لایێ لایەنێن سیاسی ڤە بۆ وان ھاتینە رەوانەکرن و ھەشت بەربژار ژی ب کوتا مەسیحینە کو ل دووڤ یاسایێ کورسیەک بۆ وان ھاتیە دیارکرن و پێنج کەسان ژی ب شێوەیەکێ سەربەخوە خوە بەربژارکریە و گۆت: "٢٦٤ بنگەە بۆ رۆژا دەنگدانێ ل پارێزگەھا دھۆکێ ھاتینە بەرھەڤکرن، بەلێ ھێشتا ژمارا وێستگەھان نەھاتیە دیارکرن".
ل دووماھیێ بەرپرسێ ئۆفیسا دھۆک یا کۆمسۆنا بلندا سەربەخوەیا ھەلبژارتنێن عیراقێ خویا کر کو ئەو کەسێن ناڤێن خوە بۆ سەر سندوقێن دەنگدانێ ل پارێزگەھا دھۆکێ تۆماردکەن دڤێت ئاکنجیێن پارێزگەھا دھۆکێ بن، ھەروەسا ژ باوەرناما ئامادەیی کێمتر نەبیت و رەگەزناما عیراقی و کارتا دەنگدانێ ھەبیت و گۆت: "پرۆسا تۆمارکرنا ناڤان ب شێوەیێ ئۆنلاین بۆ سەر سندوقێن دەنگدانێ ل پارێزگەھا دھۆکێ دێ ھەتا رۆژا ١/٨/٢٠٢١ یا بەردەوام بیت".
رێوار محەمەد رەشید
