رۆژا جیھانیا زارۆیان دێ ل دھۆکێ ھێتە ساخکرن

دھۆک-KDP.info- رێڤەبەرا بەشێ رەوشەنبیریا زارۆیان ل رێڤەبەریا گشتی یا رەوشەنبیری و ھونەری ل پارێزگەھا دھۆکێ ئاشکرا کر کو ب ھەلکەفتا ١/٦ رۆژا جیھانیا زارۆیان وان بەیاننامەک دەرکریە، بەلێ ژ بەر گرتنەبەرا رێکارێن ساخلەمیێ بۆ خوەپاراستن ژ ڤایرۆسێ کۆرۆنایێ ئەڤ سالە چو چالاکیێن گشتی ب ڤێ ھەلکەفتێ ل پارێزگەھا دھۆکێ ناھێنە ئەنجامدان، بەلێ ھندەک چالاکیێن تایبەت ل ھندەک جھێن دەستنیشانکری ب ڤێ ھەلکەفتێ دێ ھێنە ئەنجامدان".

عایشا شەوکەت، رێڤەبەرا بەشێ رەوشەنبیریا زارۆیان ل رێڤەبەریا گشتی یا رەوشەنبیری و ھونەری ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو ل سالێن بۆری مە چەندین چالاکیێن مەزن ب ھەلکەفتا ١/٦ رۆژا جیھانیا زارۆیان ئەنجامدان، بەلێ ئەڤ سالە ژ بەر بەلاڤبوونا ڤایرۆسێ کۆرۆنایێ و زێدەبوونا رێژا توشبوویان ب ڤی ڤایرۆسی و بۆ پاراستنا گیانێ زارۆیان چو چالاکیێن مەزن ب ڤێ ھەلکەفتێ ل پارێزگەھا دھۆکێ ناھێنە ئەنجامدان، راستە دێ ھندەک بنگەھێن کەرتێ تایبەت و میری ڤێ رۆژێ ب ئەنجامدانا چەندین چالاکیان ساخ کەن، بەلێ دێ د چارچۆڤەکری بن و بتنێ ھندەک کەسێن دەستنیشانکری دێ تێدا پشکداربن.
ناڤھاتیێ گۆت: "ب ھەلکەفتا رۆژا جیھانیا زارۆیان پیرۆزیاھیێ ل ھەمی زارۆیان دکەم و دخوازم ب ھەمی مافێن خوە شاد بن و دخوازم پەرلەمان و حکومەتا ھەرێما کوردستانێ پێداچوونەکا بلەز د رەشنڤیسا مافێن زارۆیان دا بکەت، ژ بەر کو رۆژ بۆ رۆژێ ھندەک کەسێن زارۆیان ب شێوەیەکێ نەجوان بۆ مەرەمێن خوە یێن تایبەت بکار دئینن، ب تایبەت د ناڤ سوشیال میدیایێ دا و رەنگە ل ئەڤ چەندە ل پاشەرۆژێ کارتێکرنێ ل کەسایەتیا وان بکەت".
ھەژی گۆتنێ یە کو ل دووڤ وان پێزانینێن ب دەست مالپەرێ فەرمیێ پارتی دیموکراتی کوردستان کەفتین ئەڤرۆ رۆژا ١/٦/٢٠٢١ ل دەمژمێر ٥:٠٠ ئێڤاری بنگەھێ زێوە یێ زارۆیان ل دھۆکێ ب ھەلکەفتا رۆژا جیھانیا زارۆیان دێ ھێلا گەرم ١١٦ یا زارۆیان ڤەکەت، ھەروەسا دێ خۆلەکا تەپاپێ یا سنێلان ب دووماھی ئینیت و چەندین دیاریان ژی دێ ل سەر زارۆیان بەلاڤ کەت، ب ھەمان ھەلکەفت کومەلا ئۆتیزمێ ل دھۆکێ دێ پێشوازیا زارۆیێن ئۆتیزمێ و خێزانێن وان ل باخچێن دریم ستی ل دھۆکێ کەت و دێ دیاریان ل سەر بەلاڤ کەت.

رێوار محەمەد رەشید