بەربژارێن باژێرڤانیان ژ لایێ جڤاتا پارێزگەھا دھۆکێ ڤە نەھاتنە پەسەندکرن
دھۆک-KDP.info- جڤاتا پارێزگەھا دھۆکێ ئەڤرۆ رۆژا ٣١/٥/٢٠٢١ کۆمبوونا خوە یا ئاسایی یا ژمارە ١١٦ ئەنجام دا ل دۆر پەسەندکرنا بەربژارێن باژێرڤانیێن دھۆکێ و بەرفرەھکرنا سنوورێن دوو گوندان، بەلێ ژ بەر ھندەک کێماسیان بەربژارێن باژێرڤانیان ژ لایێ ئەندامێن جڤاتا ناڤھاتی ڤە نەھاتنە پەسەند نەکرن.
فەھیم عەبدوللا حەمۆ، سەرۆکێ جڤاتا پارێزگەھا دھۆکێ د پرێس کۆنفرانسەکی دا ئاشکرا کر کو بڕیاربوو د کۆمبوونا ئەڤرۆ یا جڤاتا پارێزگەھا دھۆکێ ٤٨ بەربژارێن باژێرڤانیێن پارێزگەھا دھۆکێ بھێنە پەسەندکرن، بەلێ ژ بەر ھەبوونا ھندەک کێماسیان و تێبینیان چو ژ وان بەربژاران نەھاتنە پەسەندکرن و گۆت: "ل دەمەکێ نێزیک ئەڤ تێبینیە دێ دگەل کارگێریا پارێزگەھا دھۆکێ و لایەنێن پەیوەندیدار ب تایبەتی رێڤەبەریا گشتی یا باژێرڤانیان ھێنە چارەسەرکرن و ب زووترین دەم دێ کۆمبوونەکا دی ژ لایێ جڤاتا پارێزگەھا دھۆکێ ڤە ھێتە ئەنجامدان بۆ وێ چەندێ بەربژارێن جڤاتێن باژێرڤانیان بکەڤنە بەر دەنگدانێ و بھێنە پەسەندکرن".
ناڤھاتی ئاماژە دا وێ چەندێ کو د ھەمان کۆمبوون دا بەرفرەھکرنا سنوورێ ھەر ئێک ژ گوندێن (بیبیناوە) یێ سەر ب قەزا ئاکرێ ڤە و (سەروکانی) یێ سەر ب قەزا شێخان ڤە ب پرانیا دەنگێن ئەندامێن جڤاتێ ھاتە پەسەندکرن پشتی کو بەری نوکە ھەمی رێکارێن پێدڤی بۆ بەرفرەھکرنا سنوورێ ڤان گوندان ب دووماھی ھاتین.
رێوار محەمەد رەشید
