پارێزگارێ دهۆکێ پێشوازیی ل وەزیرێ هەرێمێ بۆ کاروبارێن پێکهاتەیان کر
دهۆك-KDP.info- ئەڤرۆ رۆژا دووشەمبی رێکەفتی ٢٠٢١/٥/٣١بەرێز "د.عەلی تەتەر" پارێزگارێ دهۆکێ پێشوازیی ل بەرێز"ئایدن مەعروف" وەزیرێ هەرێمێ بۆ کاروبارێن پێکهاتەیان ب بەرهەڤبوونا "کلارا عودیشو یەعقوب" سەرۆکا فراکسیۆنا جڤاتا گەلێ کلدان سریان ئاشوری کر.
دهەڤدیتنێدا پشتی بخێرهاتنێ وەزیرێ هەرێمێ بۆ کاروبارێن پێکهاتەیان دادیارکرن: سەرەدانا پارێزگەها دهۆکێ کریە ب مەرەما ژنێزیک یٔاگەهداربوون ل رەوشا خۆیشک و برایێن کرستیان و گوهداریکرنا کێشە و گلە و گازندێن وان ببن، دێ سەرەدانا هژمارەکا دەڤەران کەن دچوارچووڤێ سەرەدانێن واندا بۆ پارێزگەهێن هەرێما کوردستانێ، هەروەسا وەزیرێ هەرێمێ بۆ کاروبارێن پێکهاتەیان راگەهاند: پارێزگەها دهۆکێ پارێزگەها پێکڤەژیانا برایانە و ئاشتیێ یە و ئەم شانازیێ بڤێ پێکڤەژیانێ دکەین. نەتەوا کرستیان ژی وەکی پێکهاتەیەکێ رەسەنێ هەرێما کوردستانێ رۆل و تایبەتمەندیا خۆ هەیە لەورا ئەڤرۆ بۆ دیتنا خۆیشک و برایێن کرستیان مە سەرەدانا پارێزگەها دهۆکێ کریە.
پارێزگارێ دهۆکێ دپەیڤەکێدا ئاماژە ب رەوشا پێکهاتەیان لسنۆرێ پارێزگەها دهۆکێ کر و دادیارکرن: لدویڤ بەرنامێ حکۆمەتا هەرێما کوردستانێ و وێ پێکڤەژیانا دیرۆکی و دویرو درێژ ل پارێزگەها دهۆکێ ئەم هەول ددەین خزمەتا هەمی پێکهاتەیان ب دادپەروەری و یەکسانی بهێتەکرن، و مە هەمی هەول داینە زێدەگاڤی ل سەر مۆلکێ خۆیشک و برایێن کرستیان نەهێتەکرن و ئەم بەردەوام ب رێکێن یاسایی هەولا نەهێلانا زێدەگاڤیان و چارەسەرکرنا ڤان ئاریشان ددەین.
