بەرێ بنیاتی بۆ پرۆژەکێ ساخلەمیێ ل دھۆکێ ھاتە دانان
دھۆک-KDP.info- د بەردەوامیا چێکرنا پرۆژێن ساخلەمیێ دا ل پارێزگەھا دھۆکێ ئەڤرۆ رۆژا ئێکشەمبی ٣٠/٥/٢٠٢١ بەرێ بنیاتی بۆ پرۆژێ ئاڤاکرنا کلینیکێن شیرەتکاری بۆ نەخۆشخانا ئافرەت و زارۆبوونێ د ناڤ ئاڤاھیێ نەخۆشخانێ دا ب پشتەڤانیا دارایی یا وەلاتێ ئیتالیا ھاتە دانان.
د. ئەفراسیاب موسا، رێڤەبەرێ گشتی یێ ساخلەمیێ ل پارێزگەھا دھۆکێ د پرێس کۆنفرانسەکی دا ئاشکرا کر کو ئەڤرۆ بەرێ بنیاتی بۆ پرۆژێ ئاڤاکرنا کلینیکێن شیرەتکاری بۆ نەخۆشخانا ئافرەت و زارۆبوونێ ل پارێزگەھا دھۆکێ د ناڤ ئاڤاھیێ نەخۆشخانێ دا ھاتە دانان کو ئەڤ پرۆژە ھەر د چارچووڤێ پرۆژێ پشتەڤانی بۆ ساخلەمیا دەیکێ و زارۆکێ ل پارێزگەھا دھۆکێ دایە یێ کو ژ لایێ وەلاتێ ئیتالیا ڤە ب رێکا ئاژانسا ئیتالی بۆ گەشەپێدان و ھەڤکاریێ دھێتە پشتەڤانیکرن و ھەمی پێدڤیێن ساخلەمیێ یێن پێدڤی دێ د ناڤ ڤی پرۆژەیی دا ھێنە دانان و گۆت: "دوو ھۆلێن نشتەرگەریان ژی ل نەخۆشخانا قەزا ئامێدیێ ب دووماھی ھاتینە و ئەڤرۆ ئەو ژی دێ ھێنە ڤەکرن و کەڤنە د خزمەتا وەلاتیان دا".
ناڤھاتی ئاماژە دا وێ چەندێ کو ملیارەک و ٥٠٠ ملیۆن یۆرو بۆ ڤان ھەر دوو پرۆژان ژ لایێ رێکخراوا ئایسپۆ ڤە ھاتینە تەرخانکرن و گۆت: "رێکخراوا ناڤھاتی ب پشتەڤانیا ئێکەتیا ئورۆپی بۆ دەمێ چەندین سالانە پشتەڤانیەکا گەلەک باش ل ساخلەمیا پارێزگەھا دھۆکێ کریە و ل رۆژێن بەرتەنگ ھاریکاریا مە کریە و ئەڤ ھەماھەنگیە دێ دناڤبەرا مە دا یا بەردەوام بیت".
رێوار محەمەد رەشید
