١٥ ھزار گۆلێن ھاڤینی ل دھۆکێ ھاتنە چاندن
دھۆک-KDP.info- بەرپرسێ راگەھاندنێ ل سەرۆکاتیا باژێرڤانیا دھۆکێ ئاشکرا کر کو ب مەرەما زێدەکرنا رێژا کەسکاتیێ د ناڤ باژێرێ دھۆکێ دا ل رۆژێن بۆری ١٥ ھزار گۆلێن ھاڤینی ل باژێرێ دھۆکێ ھاتنە چاندن.
ئیسماعیل مستەفا، بەرپرسێ راگەھاندنێ ل سەرۆکاتیا باژێرڤانیا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو رێڤەبەریا ئەندازەیا پارکان یا سەر ب سەرۆکاتیا باژێرڤانیا دھۆکێ ڤە ل رۆژێن بۆری ١٥ ھزار گۆلێن ھاڤینی ل(سێ گوشێن ترافیک)ی و جادا (مالتایێ) و (قازی محمد) و ئوڤەر پاسا پێشمەرگە یێن د ناڤ سەنتەرێ باژێرێ دھۆکێ دا چاندن.
ناڤھاتی ئاماژە دا وێ چەندێ کو ئەو نەمامکێن گۆلان یێن کو د ناڤ سەنتەرێ باژێرێ دھۆکێ دا ھاتینە چاندن ژ جورێن (زینیان، گۆل چیچەک، گۆل ئوسمان) بوون و گۆت: "ئەڤ گۆلێن ھاتینە چاندن ھەمی ژ بەرھەمێ سەرۆکاتیا باژێرڤانیا دھۆکێ بوون و ل وەرزێن دی ژی یێن سالێ ئەڤ ھەوێن گۆل چاندنێ ل سنوورێ باژێرێ دھۆکێ د بەردەوامن بۆ وێ چەندێ روویێ باژێرێ ناڤھاتی جوانتر بھێتە نیشاندان و رێژا کەسکاتی ژی بھێتە زێدەکرن".
رێوار محەمەد رەشید
