ئەڤرۆ ٥٢ سالیا رۆژا پارێزگەھبوونا دھۆکێ دێ ھێتە ساخکرن

دھۆک-KDP.info- ل ژێر دروشمێ (دێ بەردەوام بین) رێڤەبەریا گشتی یا رەوشەنبیری و ھونەری ل پارێزگەھا دھۆکێ ب پشتەڤانیا (پ.د.عەلی تەتەر) پارێزگارێ دھۆکێ دێ ٥٢ سالیا رۆژا پارێزگەھبوونا دھۆکێ ئەڤرۆ رۆژا ٢٧/٥/٢٠٢١ ب ئەنجامدانا چەندین چالاکیان ل دەمژمێر ٦:٣٠ ئێڤاری ل باخچێن پانۆراما ئازادی ل باژێرێ دھۆکێ ساخ کەن.

حەسەن فەتاح، پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ بۆ مالپەرێ فەرمیێ پارتی دیموکراتی کوردتان ئاشکرا کر کو ئەڤرۆ ٥٢ سالیا رۆژا پارێزگەھبوونا دھۆکێ دێ ب ئەنجامدانا کۆنسێرتەکان ھونەری ب پشکداریا تیپا (روباد) یا مۆزیکێ و ھونەرمەندێ دێرینێ پارێزگەھا دھۆکێ (فەرسەت حسێن) و چەندین ھونەرمەندێن دی ھێتە ساخکرن، ھەروەسا د ھەمان دەم دا دێ پتری (٢٠) کەسایەتیێن پارێزگەھا دھۆکێ کو رەوشەنبیر و میدیاکار و دایکێن شەھیدان ژی د ناڤ دا ھەنە دێ ھێنە خەلاتکرن و گۆت: "ھەر د چارچۆڤێ ساخکرنا ڤێ رۆژێ دا چەندین ئافرەتێن خودان شیان یێن کو کارێن دەستی ئەنجام ددەن ل بنگەھێ مەحفیرێن دەستکرد یێ سەر ب رێڤەبەریا گشتی یا رەوشەنبیری و ھونەری ل پارێزگەھا دھۆکێ ڤە دێ چەندین کارێن خوە یێن ھونەری ل ھەمان جە د پێشانگەھەکێ دا نیشان دەن".

ناڤھاتی ئاماژە دا وێ چەندێ رێورەسمێن ساخکرنا رۆژا پارێزگەھبوونا دھۆکێ دێ ژ لایێ کەنالەکێ ئاسمانی ڤە ب شێوەیەکێ زیندی ھێنە ڤەگوھاستن و فریکوێنسا پەخشی بێ لوگۆ دێ بۆ ھەر کەنالەکێ بڤێت ھێتە دان، ھەروەسا ھەر کەنالەکێ بڤێت دشێت ل جھێ ساخکرنا رۆژا پارێزگەھێ ئامادەببیت و کارێ خۆ ئەنجام بدەت و گۆت: "ل  سالێن بۆری ب ڤێ ھەلکەفتێ کەرنەڤالەکێ مەزن ب پشکداریا چەندین سازیێن پەیوەندیدارێن پارێزگەھا دھۆکێ دھاتە ئەنجامدان، بەلێ ئەڤ سالە ژ بەر گرتنەبەرا رێکارێن ساخلەمیێ بۆ خوەپاراستن ژ ڤایرۆسێ کۆرۆنایێ دێ ب ڤی شێوەیی ھێتە ساخکرن".

ھەژی گۆتنێ یە کو ل رۆژا ٢٧ی گۆلانا سالا ١٩٦٩ دھۆک بوویە پارێزگەە و نوکە ژ حەفت قەزایان پێک دھێت ئەو ژی قەزایێن (زاخۆ، ئاکری، ئامێدیێ، سێمێل، دھۆک، شێخان، بەردەرەش).

رێوار محەمەد رەشید