"ئەم دخوازین پەکەکە ھێزێن خوە یێن لەشکری ببەنە ژ دەرڤەی ھەرێما کوردستانێ"
دھۆک-KDP.info- ب مەرەما بەرچاڤکرنا ڕاپۆرتا کارێ خۆ و دانا چەندین روھنکرنا ل سەر رەوشا پارێزگەھا دھۆکێ ئەڤرۆ رۆژا ٢٥/٥/٢٠٢١ (پ.د.عەلی تەتەر) پارێزگارێ دھۆکێ دگەل سەرۆک و ئەندامێن جڤاتا پارێزگەھا دھۆێ کۆمبوو.
فەھیم عەبدوللا، سەرۆکێ جڤاتا پارێزگەھا دھۆکێ د پرێس کۆنفرانسەکی دا ئاشکرا کر کو ھەر شتەکێ گرنگێ ب ژیانا خەلکێ پارێزگەھا دھۆکێ ڤە گرێدایی بیت ئەڤرۆ د ڤێ کۆمبوونێ دا ھاتە بەحسکرن و ئەڤ ھاماھەنگیە دێ یا بەردەوام بیت دگەل ئیدارا خوەجھی یا پارێزگەھا دھۆکێ ژ بەر کو ئەم تەمامکەرێن ئێک و دوینە و گۆت: "لیژنێن جڤاتا پارێزگەھا دھۆکێ کو ھەمی نوونەرێن خەلکێ پارێزگەھێ نە ئەڤرۆ ھەمی تێبینی و پێشنیارێن خوە د ڤێ کۆمبوونێ دا دانانە بەر سینگێ پارێزگەھێ و وی ژی ب سینگەکێ بەرفرەھـ وەرگرتن".
ژ ئالیێ خوە ڤە پ.د.عەلی تەتەر، پارێزگارێ دھۆکێ د پرێس کۆنفرانسەکی دا ئاشکرا کر کو د ڤێ کۆمبوونێ دا بەحسێ کار و پرۆژێن خزمەتگۆزاری و ئەو گوھۆڕینێن دھێنەکرن بەرنامێ کارکرنا کارگێریا پارێزگەھا دھۆکێ دگەل جڤاتا پارێزگەھا دھۆکێ ھاتنەکرن و د ڤێ کۆمبوونێ دا لێک تێگەھشتنەکا باش دناڤبەرا پارێزگەھا دھۆکێ و جڤاتا پارێزگەھا ناڤھاتی دا ھەبوو، ھندەک ژ وان تێبینی و پێشنیارێن ئەندامێن جڤاتێ و فراکسیونا بەری نوکە ھاتینە چارەسەرکرن و یێن ماین ژی ل رۆژێن داھاتی دێ ھەمی بزاڤان کەین بھێنە چارەسەرکرن.
ناڤھاتی گۆت: "ئەم دخوازین پەکەکە ھێزێن خوە یێن لەشکری ببەنە ژ دەرڤەی ھەرێما کوردستانێ، چونکو ھەرێما کوردستانێ یا رزگارکریە نوزانم ھەبوونا وان د ناڤ ئاخا ھەرێمێ دا بۆچیە و ئەو خەلکێ ژ بەر زیانێن پەکەکێ گوندێن خوە چولکرین و زان گەھشتیێ دێ ھەر ھێنە قەرەبووکرن".
ل دووماھیێ ژی پارێزگەرێ دھۆکێ دیار کر گوھۆرین د دامودەزگەھێن میری یێن پارێزگەھا دھۆکێ دا دێ د بەردەوام بن و سوبەھی ژی رێڤەبەرەک دێ ھێتە گوھۆڕین و دو قائیمقام ژی د رێ دانە بھێنە گوھۆرین و بەری چەند رۆژان پێنج رێڤەبەرێن ناحیان ژی ھاتبوونە گوھۆڕین.
رێوار محەمەد رەشید
