نۆشدارێن ئەرمینیا دێ نشتەرگەریێن تورا چاڤی ل دھۆکێ ئەنجام دەن
دھۆک-KDP.info- قونسلێ گشتی یێ وەلاتێ ئەرمینیا ل عیراقێ و ھەرێما کوردستانێ دگەل تیمەکێ نۆشدارێن وەلاتێ ناڤھاتی ئەڤرۆ رۆژا ٢٤/٥/٢٠٢١ سەرەدانا پارێزگەھا دھۆکێ کرن و ژ لایێ (پ.د.عەلی تەتەر) پارێزگارێ دھۆکێ ڤە ھاتنە پێشۆازیکرن کو بریارە ئەڤ تیمێ نۆشداران ھژمارەکا نشتەرگەریێن چاڤان بۆ خەلکێ پارێزگەھا دھۆکێ ئەنجام بدەن.
پ.د.عەلی تەتەر، پارێزگارێ دھۆکێ د پرێس کۆنفرانسەکی دا ئاشکرا کر کو ئەڤ تیمێ نۆشدارێن وەلاتێ ئەرمینیا دێ چەندین نشتەرگەریێن چاڤان بۆ خەلکێ پارێزگەھا دھۆکێ ئەنجام دەت یێن کو پێدڤی ب نشتەرگەریێ ھەین کو ئەڤ نۆشدارە د بسپۆرن و شارەزایەکا گەلەک باش د چارەسەرکرنا چاڤان دا ھەیە و گۆت: "دخوازم چێکرنا ڤان پەیوەندیان ببیتە دەستپێکەکا باشتر بۆ بەرفرەھبوونا پەیوەندیێن پتر د ھەمی بواران دا و ب تایبەتی د بوارێ نۆشداری و کارێن مرۆڤایەتی دا".
ژ ئالیێ خوە ڤە د. ئەفراسیاب موسا، رێڤەبەرێ گشتی یێ ساخلەمیا پارێزگەھا دھۆکێ دیار کر کو ئەڤ تیمێ نۆشداران دێ ھندەک نشتەرگەریان ئەنجام دەن کو د شیانێن وان دا نین ئەو وان نشتەرگەریان ئەنجام بدەن ئەو ژی نشتەرگەریێن تورێن چاڤی نە و گۆت: "ل دەستپێکێ نەخۆش دێ ھێنە دیتن و دووڤ دا ئەو نەخۆشێن پێدڤی ب نشتەرگەریێ ھەبیت دێ نشتەرگەری ژ لایێ ڤی تیمێ نۆشدارێن ئەرمینیا ڤە بۆ ھێتە ئەنجامدان، ھەروەسا دێ ھەماھەنگیەکا باش دناڤبەرا نۆشدارێن دھۆکێ و نۆشدارێن وەلاتێ ئەرمینیا دا پەیدابیت".
رێوار محەمەد رەشید
