٥٢ سالیا رۆژا پارێزگەھبوونا دھۆکێ دێ ھێتە ساخکرن
دھۆک-KDP.info- پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ ئاشکرا کر کو ئەڤ سالە جودا ژ سالێن بۆری دێ سال رۆژا پارێزگەھبوونا دھۆکێ ل رۆژا ٢٧/٥/٢٠٢١ ھێتە ساخکرن و ھەمی بەرھەڤی ژی بۆ ڤێ مەرەمێ ژ لایێ رێڤەبەریا وان ڤە ھاتینە کرن.
حەسەن فەتاح، پەیڤدارێ رێڤەبەریا گشتی یا رەوشەنبیری و ھونەری ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو ژ بەر گرتنەبەرا رێکارێن خوەپاراستنێ ژ ڤایرۆسێ کۆرۆنایێ ل سالا بۆری سال رۆژا پارێزگەھبوونا دھۆکێ نەھاتە ساخکرن کو ل سالێن بۆری ب ڤێ ھەلکەفتێ کەرنەڤالەک ل پارێزگەھا دھۆکێ ب پشکداریا ھەمی سازیێن میری یێن پارێزگەھا دھۆکێ و ئەنجامدانا چەندین چالاکیێن ھونەری یێن جوراوجور دھاتنە گێڕان، بەلێ ئەڤ سالە ژی وەکو یا دیار ڤایرۆسێ کۆرۆنایێ ھەر د ناڤ جڤاکی دا یێ بەلاڤە ژ بەر ڤێ چەندێ رێڤەبەریا گشتی یا رەوشەنبیری و ھونەری ل پارێزگەھا دھۆکێ ھزر د وێ چەندێ دا کر کو جودا ژ سالێن بۆری رۆژا پارێزگەبوونا دھۆکێ ب ئەنجامدانا چەندین چالاکیان و ل بەرچاڤ گرتنا رێکارێن ساخلەمیێ ساخ بکەت.
ناڤھاتی ئاماژە دا وێ چەندێ کو ئەڤ سالە ل رۆژا ٢٧/٥/٢٠٢١ دێ رۆژا پارێزگەھبوونا دھۆکێ ھێتە ساخکرن، بەلێ نە ب شێوەیێ کەرنەڤال، بەلکو د ڤێ رۆژێ دا دێ چالاکیەک ھێتە ئەنجامدان و دێ ھژمارەکا کەسایەتیان یێن کو خزمەتا پارێزگەھا دھۆکێ کرین ل سەرانسەری پارێزگەھێ ھێنە خەلاتکرن، ھەروەسا کۆنسێرتەکا ھونەری دێ بۆ ھژمارەکا ھونەرمەندێن دێرینێن پارێزگەھا دھۆکێ ھێتە گێران.
رێوار محەمەد رەشید
