شاندێکی یۆنان بۆ کاری بازرگانی سەردانی ھەرێمی کوردستان دەکات

ھەولێر-KDP.info- بەڕێوەبەری ڕاگەیاندنی یەکێتیی ژوورەکانی بازرگانیی ھەرێمی کوردستان گوتی، بۆ جێبەجێکردنی کاری بازرگانی لە ھەرێمی کوردستان شاندێکی باڵای یۆنان کە پێک ھاتووە لە سەرۆکوەزیران و کۆمەڵێک گەورەبازرگانی یۆنان، سەردانی ھەرێمی کوردستان دەکەن.

ئەسکەندەر محەمەد، بەڕێوەبەری ڕاگەیاندنی یەکێتیی ژوورەکانی بازرگانیی ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی: "کونسووڵی یۆنان ئەمڕۆ سەردانی ئێمەی کرد و باسی لەوە کرد، بڕیارە شاندێکی گەورەی یۆنان کە پێک ھاتووە لە سەرۆکوەزیران و چەند وەزیر و گەورەبازرگانان و کۆمپانیاکانی یۆنان سەردانی هەرێمی کوردستان بکەن و باسی وەبەرھێنان بکەن لە سێکتەرەکانی وزەی گۆڕاو و بونیاتنان و ئاوەدانکردنەوە."

ئەسکەندەر محەمەد گوتیشی: "یۆنان دەیەوێت پەیوەندییەکانی لەگەڵ ھەرێمی کوردستان بەرەوپێش ببات، بە تایبەتی لە بواری بازرگانیدا، چونکە ھەرێمی کوردستان بە ناوچەیەکی گرنگ و باش دەزانن بۆ ئەوەی کاری وەبەرھێنانی لێ بکەن و ئێمەش ھەموو ئاسانکارییەکیان بۆ دەکەین بۆ ئەوەی کاری وەبەرھێنان بکەن."

گوتیشی: "ئەوان خۆیان کاتەکە دیاری دەکەن بۆ ئەوەی سەردانی ھەرێمی کوردستان بکەن، ئەمەش گرنگیی زۆری بۆ ھەرێمی کوردستان ھەیە، چونکە ھەرێمی کوردستان ھەمیشە دەیەوێت پەیوەندییەکانی لەگەڵ وڵاتان باش بێت".

بڵند ئیبراھیم