" هەرێما کوردستانێ دێ بیتە خودان بوودجە"
دهۆک- KDP.info- پشتی وەزیرێ دارایی و ئابووری ئاوات جەناب نوری ئیمزا لە سەر ڕەشنڤیسێ بوودجەیێ هەرێما کوردستانێ کری، شارەزایێن ئابووری ددەنە خوویاکرن، ئەگەر کوردستان ببیتە خودان بوودجەیەکا تایبەت وی دەمی خەرجی و داهات دێ ب یاسا هێنە رێکخستن و دێ بیتە هۆکار کو شەفافییەت زێدەتر هەبیت.
هەڤدەم، نەجات شەعبان ئامێدی، ئەنداما لیژنا دارایی و ئابووری ل پەرلەمانێ کوردستانێ دیارکر، بودجە نەخشە رێکا یاسایی یە ل ژێر روناهیا بەرنامێ کارناما سەرۆکێ حکومەتا هەرێما کوردستانێ ژ بۆ کونترولکرنا گەندەلی یێ ، چەسپاندنا شەفافیەتێ، ساناهی کرنا چاڤدێریێ و سنوردارکرنا داهاتا ب سازیێن حکومەتێ ڤە کو هەمی یەکەیێن کارگێری و دەزگەهێن گشتی دیف بڕێ تەرخانکری بۆ وان د ناف بودجێ دا رەفتارێ بکەن.
ناڤهاتی بۆ ماڵپەڕێ فەرمیێ پارتی دیموکراتی کوردستان گۆت:" و ژلایەکێ دیڤە هەبوونا بودجەی دەلیلێ هەبوونا دەزگەهێن یاسایی کو گرێداینە ب دەستهەلاتێن یاسایی ڤە ژ بەر کو هەمی تشت دێ بن کنترولا لایەنێن پەیوەندیدار بن ژ وان ژی پەرلەمان کو بالاترین دەستهەلاتا یاسادانانێ و چاڤدێریکرنێ یە و هەروەسا بودجەی گرنکییەکا ئاشکرا یا هەی ب رێکا پابەندبوونا حکومەتێ ب ئالیێن خەرج کرنێ ئەوێن د بودجەیدا هاتینە دیارکرن، دیف داهاتێن ستاندی ب شێوەکی کو رێکێ ل بەردەم پەرلەمانی ڤەدکەت بۆ چاڤدێری کرنێ سەر تێچوونێ و خەرجکرنێ بشێوەیەکێ یاسایی، گرنکیا بودجەی دیسان ئەوە کو ئامرازەکێ سەرەکی یە کو ب رێکا وێ حکومەت ئارمانجێن خۆیێن سیاسی، ئابووری و کۆمەڵایەتی جێ بەجێ دکەت و د بیتە ئەگەرێ سەقامگیریا ئابووری.
ژئالییەکی دیڤە، ئابووریناس کاوە عەبدوولعەزیز، بۆ مالپەرێ فەرمیێ پارتی دیموکراتی کوردستان گۆت:" بابەتێ بودجەی بۆ هەرێما کوردستانێ بابەتەک هەستیارە د ڕەوشەکا وەکی نهایا ئابووریدا، ژبەرکوو هەمی داهاتی و مەزاختی یێ گشتی یێن هەرێما کوردستانێ بهێنە رێکخستن د چارچۆڤێ یاساییەکێ دا و شەفافی تێدا دیاردبیت و د پرۆسەیەکا یاسایی و دەستووری دا دەرباز بیتن، و ژ جڤاتا وەزیران دەرباز بیت و بهێتە ڕەوانەکرن بۆ پەرلەمانی.
ناڤهاتی دیارژیکر، پەرلەمان دڤێت ب هویری ل سەر ڤی پرۆژەی راوەستییت و کێماسییان ژێ دەرئێخیت، و چاکییان زێدەکەن و ئێدی مەزاختیێن هەرێما کوردستانێ د چارچۆڤەکی یاسایی دا بن.
دیارژی کر، کابینەیا ٩ یا حکومەتێ ل سەر بنگەهێ شەفافییەت و چاکسازیێ هاتییە دامەزراندن ئەگەر داهاتێ حکومەتێ چەند کێم ژی بیت دڤێت بهێتە ب بوودجەکرن، چونکی دا بەرەلایی نەکەفیتە د داهات و خەرجییان دا، چونکی نەبوونا بودجەیی زێدەتر گەندەڵی و ب هەدەردانا سامانێن گشتی هەیە.
کاروان باعەدری
