ھاتنوچوونا دھۆکێ پلانا خوە یا رۆژێن جەژنا رەمەزانێ راگەھاند
دھۆک-PDK.info-رێڤەبەریا ھاتنوچوونێ ل پارێزگەھا دھۆکێ ئەڤرۆ رۆژا ١١/٥/٢٠٢١ پلانا خوە یا رۆژێن جەژنا رەمەزانا پیرۆز و ئامارێن روودانێن ھاتنوچوونێ یێن ئەڤ سالە ل پارێزگەھا دھۆکێ ھاتینە تۆمارکرن راگەھاندن.
موقەدمێ مافپەروەر ئازاد تەھا، بەرپرسێ راگەھاندنا رێڤەبەریا ھاتنوچوونێ ل پارێزگەھا دھۆکێ د پرێس کۆنفرانسەکی دا ئاشکرا کر کو د رۆژێن جەژنا رەمەزانا پیرۆز دا ھەمی کادر و کارمەندێن رێڤەبەریا ھاتنوچوونێ ل پارێزگەھا دھۆکێ دێ د ئەرکێ خوە دا بن ژ پێخەمەت پاراستنا گیانێ وەلاتیان، ھەروەسا ل ھەمی ترافیک لایتان دێ پۆلیس د ئامادەبن و ھێلا گەرما ترافیکی یا ١٨٨ دێ د خزمەتا وەلاتیان دابیت و گۆت: "رێڤەبەریا ھاتنوچوونا پارێزگەھا دھۆکێ ھەماھەنگیەکا گەلەک باش دگەل ھەمی دامودەزگەھێن ئێمناھیێ ل پارێزگەھا دھۆکێ ئەنجامدایە".
ناڤھاتی خویا کر ھەر ترۆمبێلەکا د رۆژێن جەژنێ دا دەست ب سەر دا بھێتەگرتن ناھێتە بەردان ھەتا کو جەژنا رەمەزانا پیرۆز ب دووماھی بھێت، ھەروەسا رێڤەبەرێن بەشێن رێڤەبەریا وان ل قەزا و ناحیێن سەر ب پارێزگەھا دھۆکێ ژی ڤە دێ د خزمەتا وەلاتیان دا بن بۆ ھەر روودان و ئاستەنگەکێ و گۆت: "ھیڤیدارین ژ ھەمی وەلاتیان پێگێریێ ب رێنمایێن ھاتنوچوونێ بکەن و ل دەمێ ترۆمبێلێ د ھاژوون لەزاتیێ بکارنەئینن و قاویشا سلامەتیێ گرێدەن، سەرەرایی ڤێ چەندێ پێگێریێ ب مەرج و رێنمایێن ساخلەمیێ ژی بکەن و کەمامان بکەنە بەرخوە بۆ خوەپاراستن ژ ڤایرۆسێ کۆرۆنایێ".
ل دووماھیێ بەرپرسێ راگەھاندنا رێڤەبەریا ھاتنوچوونێ ل پارێزگەھا دھۆکێ دیار کر کو د چار ھەیڤێن بۆری یێن ئەڤ سالە دا ٢٥٢ روودانێن ھاتنوچوونێ ل پارێزگەھا دھۆکێ رووداینە و د ڤان روودانان دا ٢٤ کەسان گیانێ خوە ژ دەست دایە و ٢٨٢ کەس ب سەختی برینداربووینە و گۆت: "د ھەیڤا رەمەزانا پیرۆز یا ئەڤ سالە دا ٤٧ روودانێن ھاتنوچوونێ ل پارێزگەھا دھۆکێ ھاتینە تۆمارکرن و د ڤان روودانان دا ٧١ کەس برینداربووینە و ھەشت کەسان ژی گیانێ خوە ژ دەست دایە و پتریا ڤان روودانێن ھاتینە تۆمارکرن ل رێیێن ژ دەرڤەی باژێرێ دھۆکێ رووداینە".
رێوار محەمەد رەشید
