پازدە کارگەھێن نوی دێ ل دھۆکێ ھێنە چێکرن

دھۆک-KDP.info-  لیژنا پیشەسازی ل پارێزگەھا دھۆکێ ئەڤرۆ رۆژا ٢٨/٤/٢٠٢١ کۆمبوونا خوە ب سەرپەرشتیا د. عەلی تەتەر، پارێزگارێ دھۆکێ ئەنجام دا و تێدا پرۆژێن چێکرنا ١٥ کارگەھێن نوی ل پارێزگەھا دھۆکێ پەسەند کرن.

کوردۆ ئیحسان، رێڤەبەرێ گشتی یێ وەبەرھێنانێ ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو پشتی د کۆمبوونێ دا وان ھەلسەنگاندن و دانوستاندن ل سەر پرۆژێن ١٥ کارگەھێن پیشەسازی یێن جۆراوجۆر ژ وان کارگەھا ''دروستکرنا تەلیسان، بوویاغ، دوشاڤا تەماتێ، دروستکرنا زەیتا زەیتونان، خزمەتگۆزاریا پیشەسازیا ترۆمبێلان و ھتد...'' ھاتیەکرن، ئەڤ کارگەھە ژ لایێ لیژنا پیشەسازی ڤە ل پارێزگەھا دھۆکێ ھاتنە پەسەند کرن.

ناڤھاتی ئاماژە دا وێ چەندێ کو د ڤێ کۆمبوونێ دا زەڤی بۆ پرۆژێن چێکرنا ١٥ کارگەھان ھاتنە تەرخانکرن ژ وان پرۆژان حەفت پرۆژە ژ لایێ رێڤەبەریا گەشەپێدانا پیشەسازی و ھەشت پرۆژە ژ لایێ رێڤەبەریا گشتی یا وەبەرھێنانێ ل پارێزگەھا دھۆکێ ڤە ھاتبوونە پێشکێشکرن و گۆت: "ئەڤ پرۆژە دێ ل ھەمی قەزایێن سەر ب پارێزگەھا دھۆکێ ڤە ژ لایێ سەرمایەداران ڤە ھێنە چێکرن".

رێڤەبەرێ گشتی یێ وەبەرھێنانێ ل پارێزگەھا دھۆکێ خویا کر کو ئەڤە قووناغا ئێکێ یا ڤان پرۆژان بۆ، دووڤ دا دێ مامەلێن ڤان پرۆژان بۆ رێڤەبەریێن پەیوەندیدار ھێنە رەوانەرکرن بۆ وێ چەندێ رێکارێن دی یێن پێدڤی بۆ بجھئینانا ڤان پرۆژان بھێنە بەرھەڤکرن و گۆت: "دەلیڤێن کاری ب رێیا چێکرنا ڤان پرۆژان دێ بۆ ب سەدان گەنجێن پارێزگەھا دھۆکێ پەیدا بن".

 

رێوار محەمەد رەشید