رێڤەبەرێن نوی یێن (پۆلیس، ھاتنوچوون، رەگەزنامە) ل دھۆکێ دەستبکاربوون
دھۆک-KDP.info-د چارچۆڤێ وان گوھۆرینێن کارگێری یێن بەردەوام ل سنوورێ پارێزگەھا دھۆکێ دھێنە ئەنجامدان ئەڤرۆ رۆژا ٢٨/٤/٢٠٢١ د رێورەسمەکی دا ب ئامادەبوونا (د. عەلی تەتەر) پارێزگارێ دھۆکێ و لیوا (تارق ئەحمەد) رێڤەبەرێ گشتی یێ پۆلیسێن ھەرێما کوردستانێ و چەندین رێڤەبەرێن دەزگەھێن ئێمناھیێ، رێڤەبەرێن نوی یێن رێڤەبەریێن (پۆلیس، رەگەزنامە، ھاتنوچوون) ل پارێزگەھا دھۆکێ دەستبکاربوون).
د. عەلی تەتەر، پارێزگارێ دھۆکێ د پەیڤەکێ دا ئاشکرا کر کو گوھۆرینێن کارگیریی کارەکێ گەلەک نۆرمالە و ھەکە نەھێنە ئەنجامدان دبیتە جھێ گازندەیان و گوھۆڕین ھەمی دەمان کارەکێ ئەرێنی یە و گۆت: "د ڤی رێورەسمی دا ئەز سۆپاسیا ماندوبوونا ھێزێن ئێمناھیێ ب شێوەیەکێ گشتی دکەم کو ئەم قەردارێن ھەوەینە بۆ وێ ئێمناھی و خوەشی و سەقامگێریا ل ھەرێما کوردستانێ ھەی مل ب ملێ پێشمەرگێن قەھرەمان، ئەڤە د دەمکی دایە کو یاسا ب شێوەیەکێ گەلەک باش ل پارێزگەھا دھۆکێ دھێتە بجھئینان و ب جھئینانا یاسایێ دێ ل بەراھیا ھەمی بەرنامێن مەبیت".
لیوا تارق ئەحمەد، رێڤەبەرێ گشتی یێن پۆلیسێن ھەرێما کوردستانێ د پەیڤەکێ دا دیار کر کو گوھۆڕین کارەکێ د ھەر پۆستەکی دا ب تایبەت یێن سەر ب وەزارەتا ناڤخۆ ڤە کارەکێ سرۆشتیە بۆ وێ چەندێ پتر خزمەتا خەلکی بھێتەکرن ژ بەر ڤێ چەندێ ئەڤرۆ ھەر ئێک ژ (عەمید شەعلان مستەفا) نوکە وەکو رێڤەبەرێ پۆلیسێن پارێزگەھا دھۆکێ ب وەکالەت ھاتە ڤەگوھاستن بۆ رێڤەبەریا گشتی یا پۆلیسێن ھەرێما کوردستانێ ل ھەولێرا پایتەخت و (عەمید فەخری ئەحمەد مەجید) وەکو رێڤەبەرێ پۆلیسێن ھاتنوچوونا پارێزگەھا دھۆکێ ھاتە ڤەگوھاستن بۆ پۆستێ رێڤەبەرێ پۆلیسێن پارێزگەھا دھۆکێ، ھەروەسا (عەمید ئیبراھیم عەگید سەدیق) رێڤەبەرێ رەگەزناما دھۆکێ یە ھاتە ڤەگوھاستن بۆ پۆستێ رێڤەبەرێ پۆلیسێن ھاتنوچوونا پارێزگەھا دھۆکێ، ھەروەسا (عەمید رێبەر) وەکو رێڤەبەرێ رێڤەبەریا ئاکنجیبوونێ ل پارێزگەھا دھۆکێ ھاتە ڤەگوھاستن بۆ پۆستێ رێڤەبەرێ رەگەزناما پارێزگەھا دھۆکێ.
رێوار محەمەد رەشید
