ب کوژمێ چار ملیار دیناران پرۆژە دێ ل شێخان ھێنە چێکرن
دھۆک-KDP.info- ب مەرەما گرنگیدانەکا زێدەتر ب قەزا شێخان ژ لایێ حکومەتا ھەرێما کوردستانێ ڤە ئەڤرۆ رۆژا ٢٥/٤/٢٠٢١ (پ.د.عەلی تەتەر) پارێزگارێ دھۆکێ سەرەدانا قەزا ناڤھاتی کر و ب کۆژمێ چار ملیار دیناران ل سەر بودجا حکومەتا ھەرێمێ پرۆژێن نوی ل وێ قەزایێ راگەھاندن.
پ.د.عەلی تەتەر، پارێزگارێ دھۆکێ د پرێس کۆنفرانسەکێ دا ئاشکرا کر کو پشتی ل رۆژێن بۆری وی سەرەدانا قەزا شێخان کری و ب کۆژمێ نێزیکی حەفت ملیار دیناران پرۆژێن خزمەتگۆزاری لێ ڤەکرن، ئەڤرۆ دووبارە سەرەدانا قەزا ناڤھاتی کرە ڤە ب مەرەما راگەھاندنا ھندەک پرۆژێن نوی یێن خزمەتگۆزاری ل ھەمان قەزا و گۆت: "ئەڤرۆ مە کۆمبوونەک دگەل قایمقام و رێڤەبەرێن سازیێن پەیوەندیدار ل قەزا شێخان ئەنجامدا و پشتی چەندین دانوستاندن ل سەر پرۆژێن پێدڤی بۆ دەڤەرێ ھاتیەکرن دێ د قووناغا ئێکێ دا چەندین پرۆژێن خزمەتگۆزاری ب کۆژمێ چار ملیار دیناران ل سەر بودجا حکومەتا ھەرێما کوردستانێ ل ڤێ قەزایێ ھێنە چێکرن".
ناڤھاتی گۆت: "مە ڤەکۆلین ل دۆر داخوازیێن نوی ژی یێن ڤی قەزایێ کریە و بۆ قووناغا دووێ ژی چەندین پرۆژە ھاتینە بەرچاڤکرن، ژ بەر کو ئێک ژ کارێن مە یێن دەستپێکێ بابەتێ پرۆژێن خزمەتگۆزاریە و ئەڤ پرۆژە بەردەوام دێ بۆ ڤێ دەڤەرێ ھێنە پێشکێشکرن و جەنابێ سەرۆکێ حکومەتا ھەرێما کوردستانێ ژی یێ رژدە ل سەر وێ چەندێ کو ئەم بەردەوام خوە ل ئاریشەیێن خەلکی بکەینە خودان و ئاریشێن وان بگەھینینە جھێ مەرەمێ".
ل دووماھیێ پارێزگارێ دھۆکێ خویا کر کو بەھرا پتریا ڤان پرۆژێن ئەڤ جارە ھاتینە راگەھاندن دێ بۆ ناحیێن ب سەر قەزا شێخان ڤە بن و پشکا ھەرە مەزن یا ڤان پرۆژان ژی دێ بۆ ناحیا کەلەکچی بیت و ل سەر داخوازا گەنجێن ناحیا ناڤھاتی دێ یاریگەھەکا مەزن بۆ ھێتە چێکرن.
رێوار محەمەد رەشید
