ب کوژمێ پتری حەفت ملیار دیناران دو ئەندەرپاس دێ ل پارێزگەھا دھۆکێ ھێنە چێکرن
دھۆک-KDP.info- رێڤەبەرا رێک و پرا ل پارێزگەھا دھۆکێ ئاشکرا کر کو ل دەمەکێ نێزیک دێ دەست ب چێکرنا دو ئەندەرپاسان ل ھەر ئێک ژ قەزایێن (زاخۆ، سێمێل) یێن ب سەر پارێزگەھا دھۆکێ ڤە ھێتە کرن و گۆت: "کوژمێ پتری حەفت ملیار دیناران بۆ بجھئینانا ڤان ھەر دو پرۆژان ھاتیە تەرخانکرن".
ئەندازیار خەدیجە محەمەد ئەحمەد، رێڤەبەرا رێک و پرا ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو پشتی سەرۆکێ حکومەتا ھەرێما کوردستانێ ل ھەیاما بۆری سەرەدانا قەزا زاخۆ کری بڕیار ل سەر بجھئینانا پرۆژێ ئەندەرپاسا (نیو زاخۆ) ھاتەکرن و گۆت: "نوکە ئەڤ پرۆژە د قووناغا دووماھیێ یا دیزاینێ دایە و ئەم پێشبینیێ دکەین د ڤێ ھەیڤێ دا ئەڤ پرۆژە ب کوژمێ سێ ملیار و ٤٠٠ ملیۆن دیناران بکەڤیتە د بوارێ بجھئینانێ دا".
ناڤھاتیێ ئاماژە دا وێ چەندێ کو نوکە کار د چێکرنا دیزاینا دەستپێکێ یا ئەندەرپاسا سێمێلێ دا ب دووماھی ھاتیە و ژڤانە د دەمێ سێ حەفتیێن داھاتی دا دیزاینا وێ ب تمامی ب دووماھی بھێت و ب کەڤیتە د بوارێ بجھئینانێ دا و گۆت: "چار ملیار و ٢٠٠ ملیۆن دینار بۆ بجھئینانا ڤی پرۆژەی ھاتینە تەرخانکرن".
ل دووماھیێ رێڤەبەرا رێک و پرا ل پارێزگەھا دھۆکێ خویا کر کو ٥٠٠ رۆژ بۆ ب دووماھی ھاتنا ڤان ھەر دو پرۆژان ھاتینە دەستنیشانکرن، بەلێ ئەو پێشبینیێ دکەن زووتر ژ ڤی دەمێ دەستنیشانکری ئەڤ ھەر دو پرۆژە ب دووماھی بھێن و بکەڤنە د خزمەتا وەلاتیان دا.
رێوار محەمەد رەشید
