ئەمریکا دێ دەرگەھەکێ شینواری ل ئامێدیێ نووژەن کەت
دھۆک-KDP.info- قایمقامێ قەزا ئامێدیێ ئاشکرا کر کو وەلاتێ ئەمریکا دێ دەرگەھێ بەھدینان یێ شینواری ل قەزا ئامێدیێ یا سەر ب پارێزگەھا دھۆکێ ڤە نووژەن کەت و گۆت: "٥٠٠ ھزار دۆلار بۆ ڤێ مەرەمێ ژ لایێ وەلاتێ ناڤھاتی ڤە ھاتینە تەرخانکرن".
ئیسماعیل مستەفا، قایمقامێ قەزا ئامێدیێ بۆ مالپەرێ فەرمیێ پارتی دیموکراتی کوردستان دیار کر کو پشتی ل رۆژێن بۆری (روب والەر) قۆنسلێ گشتی یێ وەلاتێ ئەمریکا ل ھەرێما کوردستانێ سەرەدانا قەزا ئامێدیێ کری ٥٠٠ ھزار دۆلار بۆ نووژەنکرنا دەرگەھێ بەھدینان یێ شینواری ل باژێرێ ئامێدیێ تەرخانکرن داکو مەترسیا ژناڤچوونێ ل سەر نەمینیت و گۆت: "ل دەمەکێ نێزیک کارێ نووژەنکرنا ڤی دەرگەھی دێ ژ لایێ زانکۆیا کولومبیا ل ئەمریکا کو ئێکە ژ مەزنترین زانکۆیان د بوارێ شینواران دا ل سەرانسەری جیھانێ ھێتەکرن".
ناڤھاتی ئاماژە دا وێ چەندێ کو ھەر د چارچۆڤێ سەرەدانا قۆنسلێ گشتی یێ وەلاتێ ئەمریکا دا بۆ قەزا ئامێدیێ وان سەرەدانا چەندین جھێن شینواری یێن قەزا ناڤھاتی کر ژوان (دەرگەھێ ئامێدیێ گورێ سولتانی، کنیشتا جوھیان، قوتابخانا قوبەھان و گۆت: "مە داخواز ژ قۆنسلێ گشتی یێ ئەمریکا ل ھەرێما کوردستانێ کر کو ل دەمێن داھاتی پتر گرنگیێ ب دەڤەرا ئامێدیێ بدەن و نووژەنکرنا چەندین جھێن دی ییچن شینواری ل دەڤەرێ ب ستویێ خوەڤە بگرن وەکو قوتابخانا قوبەھان یا شینواری".
رێوار محەمەد رەشید
