ئەڤرۆ ب کۆژمێ پتری چار ملیار دیناران پرۆژە یێ ل شێخان دھێنە ڤەکرن
دھۆک-KDP.info- ب مەرەما پتری گرنگیدان ب دەڤەرێن دکەڤنە سنوورێ ماددێ ١٤٠ و گەھاندنا خزمەتگۆزاریان بۆ وان دەڤەران ئەڤرۆ رۆژا ١١/٤/٢٠٢١ (پ.د.عەلی تەتەر) پارێزگەرێ دھۆکێ دێ ژمارەکا پرۆژێن خزمەتگۆزاری ب کوژمێ پتری چار ملیار دیناران ل قەزا شێخان ڤەکەت و بەرێ بنیاتی ژی دێ بۆ ژمارەکا پرۆژان ھێتە دانان.
مللەت عسمەت، سکرتێرێ رۆژنامەڤانیێ پارێزگەرێ دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو د بەردەوامیا ڤەکرنا پرۆژێن خزمەتگۆزاری دا ل دەڤەرێن دکەڤنە سنوورێ ماددێ ١٤٠ ئەڤرۆ (پ.د.عەلی تەتەر) پارێزگەرێ دھۆکێ ل دەمژێر ٩:٠٠ سپێدێ دەست ب ڤەکرنا چەندین پرۆژان ل سنوورێ قەزا شێخان کریە ژ وان پرۆژان ژی ڤەکرنا رێیا سەرەکی و پرۆژێ ئاڤێ و کارگەھا روینێ زەیتونا ل پەرستگەھا لالش ب کوژمێ ١١١ ملیار و ٤٣٢ ھزار دیناران ل سەر بۆدجا تایبەت یا سەرۆکێ حکومەتا ھەرێما کوردستانێ ھەروەسا ڤەکرنا ئاڤاھی و کوگەھا ھوبا چاندنێ ل قەزا شێخان و ڤەکرنا یاریگەھا وەرزشی یا حەفت یاریزانی یا گرتی و باخچێ زارۆیان ل قەزا ناڤھاتی و گۆت: "ھەر د چارچۆڤێ سەرەدانا پارێزگارێ دھۆکێ دا بۆ قەزا شێخان بەرێ بنیاتی بۆ کۆمەلگەھا کارگێری یا ناحیا کەلەکجی ب کوژمێ ٧٥٨ ملیۆن و ٤٨٣ ھزار و ٥٠٠ دیناران ل سەر بۆدجا وەزارەتا ناڤخۆ یا حکومەتا ھەرێما کوردستانێ ھاتە دانان".
ناڤھاتی ئاماژە دا وێ چەندێ کو د بەردەوامیا ڤەکرنا پرۆژێن خزمەتگۆزاری دا ژ لایێ پارێزگەرێ دھۆکێ ڤە ل قەزا شێخان ئەڤرۆ ل دەمژمێر ١٢:٣٠ نیڤرۆ دێ یاریگەھا وەرزشی یا حەفت یاریزانی یا گرتی ل کومەلگەھا زیلکان ڤە ھێتە ڤەکرن، ھەروەسا ل دەمژمێر ١:٣٠ پشتی نیڤرۆ دێ قوتابخانا گوندێ بیباڤا ل ناحیا قەسرۆکێ ب کوژمێ ٣٥٠ ملیۆن دیناران ل سەر بودجا حکومەتا ھەرێما کوردستانێ ھێتە ڤەکرن و دووڤ دا چەندین رێیێن ناڤخۆیی یێن باعەدرێ و ئیسیان ب کوژمێ ٨٣٠ ملیۆن دیناران ل سەر بودجا حکومەتا ھەرێما کوردستانێ دێ ھێنە ڤەکرن و گۆت: "بۆدجا ھندەک ژ وان پرۆژێن کو ژڤانە ئەڤرۆ ل قەزا شێخان بھێنە ڤەکرن ژ لایێ پارێزگەھا نەینەوا ڤە ھاتبوو دابینکرن".
رێوار محەمەد رەشید
