٣١ قوتابخانە یێ ل قەزا ئامێدیێ دھێنە نووژەنکرن
دھۆک-KDP.info- رێڤەبەرێ پەروەردا قەزا ئامێدیێ ئاشکرا کر کو نوکە کار یێ د نووژەنکرنا ٣١ قوتابخانێن سنوورێ قەزا ئامێدیێ دا دھێتەکرن و سەرەرایی ڤێ چەندێ کوگەھەک ژی بۆ پەروەردا ناڤھاتی یا دھێتە ئاڤاکرن.
وەجیە سەعید مستەفا، رێڤەبەرێ پەروەردا قەزا ئامێدیێ بۆ مالپەرێ فەرمیێ پارتی دیموکراتی کوردستان ئاشکرا کر کو پشتی ل ھەیاما بۆری سەرۆکێ حکومەتا ھەرێما کوردستانێ سەرەدانا قەزا ئامێدیێ کری رازەمەندی ل سەر ئەنجامدانا چەندین پرۆژان کر و د چارچۆڤێ وان پرۆژان دا سەرۆکێ حکومەتا ھەرێمێ کۆژمێ پتری ئێک ملیار دیناران تەرخانکر بۆ نووژەنکرنا ٣١ قوتابخانان و ئاڤاکرنا کوگەھەکێ ل سنوورێ قەزا ئامێدیێ.
ناڤھاتی ئاماژە دا وێ چەندێ کو بۆ دەمێ پتری ھەیڤەکێ یە دەست ب کارێ نووژەنکرن و ئاڤاکرنا کوگەھەکێ ل سنوورێ پەروەردا قەزا ئامێدیێ ھاتیەکرن و ھندەک قوتابخانە د قووناغێن دووماھیێ دانە کو ژ نووژەنکرنێ ب دووماھی بھێن و ھندەکێن دی ژی پتری ٥٠% کارێ نووژەنکرنێ تێدا ب دووماھی ھاتیە، ھەروەسا نوکە کار د ئاڤاکرنا کوگەھەکێ ژی دا بۆ پەروەردا قەزا ئامێدیێ یێ بەردەوامە و گۆت: "ب دووماھی ھاتنا کارێ نووژەنکرنا ڤان قوتابخانان دێ ژینگەھەکا خوەشتر بۆ قوتابی و مامۆستایان پەیدابیت ئەڤە ددەمەکی دایە بەردەوام مە دووپاتی ل وێ چەندێ کریە کو کارێ نووژەنکرنێ ددەمێن گۆنجایی دا بھێتە ئەنجامدان بۆ وێ چەندێ کارتێکرن ل دەواما قوتابخانان نەبیت".
ل دووماھیێ رێڤەبەرێ پەروەردا قەزا ئامێدیێ ئاشکرا کر کو نوکە ١٦٢ قوتابخانە ل سنوورێ پەروەردا وان ھەنە و ھندەک ژ وان قوتابخانان دو دەوام لێ دھێنەکرن.
رێوار محەمەد رەشید
