ھەوا وەرگرتنا سەمپلێن کۆرۆنایێ بۆ کرێکاران ل دھۆکێ دەستپێکر
دھۆک-KDP.info- ھەوەکا وەرگرتنا سەمپلێن کۆرۆنایێ بۆ کرێکارێن ل جھێن گشتی کاردکەن ئەڤرۆ رۆژا ٨/٤/٢٠٢١ ل ئێک ژ کافێ و خوارنگەھێن پارێزگەھا دھۆکێ دەستپێکر بیێ کو ژڤانێ ب دووماھی ھاتنا ڤێ ھەوێ بھێتە دیارکرن.
د. ئەفراسیاب موسا، رێڤەبەرێ گشتی یێ ساخلەمیێ ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو ب مەرەما دەستنیشانکرنا حالەتێن نوی یێن ڤایرۆسێ کۆرۆنایێ ب تایبەتی ل جھێن گشتی ئەڤرۆ وان ھەوەکا وەرگرتنا سەمپلێن کۆرۆنایێ بۆ کرێکارێن ل جھێن گشتی یێن پارێزگەھا دھۆکێ کاردکەن دەستپێکر و گۆت: "ژڤانێ ب دووماھی ھاتنا ڤێ ھەوێ مە دیارنەکریە، بەلێ د ڤێ ھەوێ دا دێ سامپلێن ڤایرۆسێ کۆرۆنایێ ژ ھەمی کرێکارێن ل جھێن گشتی یێن پارێزگەھا دھۆکێ کاردکەن وەکو کافێ و خوارنگەهـ و ھتد... بێ بەرامبەر ھێنە وەرگرتن و ھەر کرێکارەکێ ھەلگرێ ڤایرۆسی بیت ب چو شێوەیان نابیت خزمەتێ ل جھێن گشتی بکەت".
رێڤەبەرێ گشتی یێ ساخلەمیێ ل پارێزگەھا دھۆکێ ئاماژە دا وێ چەندێ کو ژمارا توشبوویان ب ڤایرۆسێ کۆرۆنایێ و گیان ژ دەستدانێ ژ ئەگەرێ ھەمان ڤایرۆس ل پارێزگەھا دھۆکێ بەر ب زێدەبوونێ یە و رەوش یا مەترسیدارە و رۆژانە پتری سێ ھزار پشکنینان ل تاقیگەھێن وان بۆ گۆمانلێکرین ڤایرۆسێ کۆرۆنایێ دھێنەکرن و گۆت: "ھەتا نوکە جھێ ڤەحەواندنا نەخۆشێن کۆرۆنایێ د ناڤ نەخۆشخانێن پارێزگەھا دھۆکێ دا یێن کو بۆ ڤێ نەخۆشیێ ھاتینە تەرخانکرن یێ ھەیی، بەلێ ھەر دەمێ جە نەما رەنگە دووبارە نەخۆشخانا ئازادی ل پارێزگەھا دھۆکێ بۆ ڤێ نەخۆشیێ تەرخان بکەینە ڤە".
رێوار محەمەد رەشید
