سەنتەرێ پشکنین و ڤەکۆلینێن کۆرۆنایێ ل زانکۆیا دھۆک ھاتە ڤەکرن
دھۆک-KDP.info- سەنتەرێ پشکنین و ڤەکۆلینێن کۆرۆنایێ ئەڤرۆ رۆژا ٥/٤/٢٠٢١ ب ئامادەبوونا (د.سامان بەرزنجی) وەزیرێ ساخلەمیا حکومەتا ھەرێما کوردستانێ و (پ.د.مسلح دھۆکی) سەرۆکێ زانکۆیا دھۆک و (د.ئەفراسیاب موسا) رێڤەبەرێ گشتی یێ ساخلەمیێ ل پارێزگەھا دھۆکێ ل زانکۆیا دھۆک ھاتە ڤەکرن.
د.سامان بەرزنجی، وەزیرێ ساخلەمیا حکومەتا ھەرێما کوردستانێ د پرێس کۆنفرانسەکی دا ئاشکرا کر کو ھەر ژ دەستپێکا بەلاڤبوونا ڤایرۆسێ کۆرۆنایێ ل ھەرێما کوردستانێ وەزارەتا خواندنا بلند و ڤوکۆلینێن زانستی و وەزارەتا ساخلەمیێ ھەماھەنگیەکا گەلەک باش دگەل ئێک ھەبوویە ب تایبەت ژ لایێ نۆشداری ڤە ژ سالا بۆری وەرە ل گەلەک زانکۆیان تاقیگەھێن کۆلیژان ئێخستنەنە د خزمەتا کەرتێ ساخلەمیێ دا و گۆت: "ئەڤرۆ ژی سەنتەرێ پشکنین و ڤەکۆلینێن کۆرۆنایێ ل زانکۆیا دھۆک ھاتە ڤەکرن و ئەم باوەرین ئەڤ سەنتەرە دێ پشتەڤانیەک بیت بۆ رێڤەبەریا گشتی یا ساخلەمیێ ل پارێزگەھا دھۆکێ بۆ دوڤچوون و دەستیشانکرنا حالەتێن کۆرۆنایێ ب تایبەت د ڤێ قووناغێ دا وەکو یا دیار پێلەکا دی یا ڤایرۆسێ کۆرۆنایێ بەلاڤبوویە".
ناڤھاتی ئاماژە دا وێ چەندێ کو ئەڤ سەنتەرە دێ بۆ ھەمی جۆرێن ڤایرۆسان ھێتە بکارئینان ئەڤە ددەمەکی دایە وەزارەتا ساخلەمیێ ژ سالا بۆری وەرە ب دەھان ڤەکۆلین ئەنجامداینە، بەلێ ڤەکۆلینێن ئەکادیمی پێدڤی ب ژێدەرێن زێدەتر ھەیە وگۆت: "رێژا تووشبوونێ ب ڤایرۆسێ کۆرۆنایێ ل ھەرێما کوردستانێ د زێدەبوونێ دایە و د ٢٤ دەمژمێرێن بۆری دا ھزار و ٤٥ حالەتێن تووشبوونێ ب ڤی ڤایرۆسی و دگەل ١٦ حالەتێن گیان ژدەستدانێ ب ھەمان ئەگەر ل ھەرێما کوردستانێ ھاتینە تۆمارکرن و کۆنترۆلکرنا رێژا تووشبوویان پیدڤی ب رێکارێن توند یێن ساخلەمیێ ھەنە ژ لایێ حکومەتێ و وەلاتیان ڤە و ھەکە رەوش ب ڤی شێوەیی یا بەردەوام بیت مەترسیا پەیدابوونا کارەساتان ھەیە و ل رۆژا ١٠ی نیسانێ لیژنا بلند یا بەرھەنگاربوونا کۆرۆنایێ ل ھەرێما کوردستانێ دێ کۆمبیت و رەنگە بریار ل سەر قەدەغەیا ھاتنوچوونا رێژەیی بھێتەدان".
ل دووماھیێ وەزیرێ ساخلەمیا حکومەتا ھەرێما کوردستانێ گۆت: "دخوازم وەلاتی ناڤێن خوە بۆ دانانا ڤاکسینی تۆمار بکەن و ئەو ڤاکسیێ ل ھەرێما کوردستانێ دھێتەدانان یێ رێ پێ دایە ژ لایێ رێکخراوا ساخلەمیێ جیھانی ڤە، ھەروەسا ئەو کارمەندێن ساخلەمیێ یێن کو ب کارێ دانانا ڤی ڤاکسینێ رادبن بۆ وەلاتیان ھەمی بەری نوکە ھاتینە مەشقدان و ب دروستاھی کارێ خوە ئەنجام ددەن".
رێوار محەمەد رەشید
