باژێرڤانیا زاخۆ ژ رێڤەبەریا گشتی یا باژێرڤانیان ل پارێزگەھا دھۆکێ جودابوو
دھۆک-KDP.info- د رێورەسمەکی دا ئەڤرۆ رۆژا ٢٩/٣/٢٠٢١ ب ئامادەبوونا ئەندازیار (دیار بەحری) رێڤەبەرێ گشتی یێ باژێرڤانیان ل پارێزگەھا دھۆکێ و ئەندازیار (وەلات سەعید) سەرۆکێ باژێرڤانیا زاخۆ ئیمزا ل سەر بڕیارا جودابوونا باژێرڤانیا زاخۆ ژ رێڤەبەریا گشتی یا باژێرڤانیان ل پارێزگەھا دھۆکێ ھاتەکرن.
ئەندازیار (دیار بەحری) رێڤەبەرێ گشتی یێ باژێرڤانیان ل پارێزگەھا دھۆکێ د پرێس کۆنفرانسەکی دا ئاشکرا کر کو پشتی چەندین کۆمبوون ل دۆر بابەتێ جودابوونا باژێرڤانیا زاخۆ ژ رێڤەبەریا گشتی یا باژێرڤانیان ل پارێزگەھا دھۆکێ ل سەر ئاستێن وەزارەتا باژێرڤانی و گەشتوگۆزار و پارێزگەھا دھۆکێ و جڤاتا پارێزگەھا دھۆکێ ھاتینە ئەنجامدان، بڕیار ھاتبوودان کو باژێرڤانیا زاخۆ ژ پلە ئێک ببیتە پلە نایاب و پشتی پارێزگەھا دھۆکێ ب نڤیسارەکا فەرمی داخواز ژ رێڤەبەریا گشتی یا باژێرڤانیان ل پارێزگەھا دھۆکێ کری کو پێدڤیە ئەڤ بڕیارە بچیتە د بوارێ بجهـ ئینانێ دا وان ژی نڤیسارەک ل دۆر ڤی بابەتی بۆ وەزارەتا باژێرڤانیێ بلندکر و پشتی نڤیسار گەھشتیە جڤاتا وەزیرێن حکومەتا ھەرێما کوردستانێ ژی و ژ لایێ وان ڤە ھاتیە پەسەندکرن ئەڤرۆ ئەڤ بڕیارە ھاتە ئیمزاکرن و باژێرڤانیا زاخۆ ژ پلە ئێک بۆ پلە نایاب.
ناڤھاتی گۆت: "ب ھەلکەفتا جودا بوونا باژێرڤانیا زاخۆ ژ رێڤەبەریا گشتی یا باژێرڤانیان ل پارێزگەھا دھۆکێ ئەز پیرۆزباھیێ ل ھەمی خەلکێ زاخۆ و باژێرڤانیا زاخۆ دکەم و ئەز باوەرم ب ڤێ چەندێ دێ کارئاسانی یێن زێدەتر بۆ وەلاتیان ھێنەکرن و ب ڤێ چەندێ ژ نوکە وێڤە باژێرڤانیا زاخۆ دێ ھەمی کارێن خوە ل دووڤ رێنما و یاسایان سەربەخوە دگەل ھەمی سازیێن پەیوەندیدار ئەنجام دەت و دێ ئێکسەر ب وەزارەتا باژێرڤانیێ ڤە ھێتە گرێدان و ھەتا رادەیەکێ گەلەک باش دێ رووتین کێم بیت".
رێوار محەمەد رەشید
