نێزیکی ١٩ ھزار گەشتیاران د رۆژێن جەژنا نەورۆزێ دا سەرەدانا دھۆکێ کریە
دھۆک-KDP.info- رێڤەبەرێ گشتی یێ گەشتوگۆزارێ ل پارێزگەھا دھۆکێ ئاشکرا کر کو ئەو پلانا وان بۆ جەژنا نەورۆزێ دانای ب مەرەما پێشوازی و خزمەتکرنا گەشتیاران ب شێوەیەکێ گەلەک باش ھاتە بجھئینان و گۆت: "١٨ ھزار و ٨٨٨ گەشتیاران د رۆژێن جەژنا نەورۆزێ دا یێن کو ئامار تێدا ھاتیە وەرگرتن سەرەدانا پارێزگەھا دھۆکێ کریە".
پ.د.خەیری عەلی ئوسۆ، رێڤەبەرێ گشتی یێ گەشتوگۆزارێ ل پارێزگەھا دھۆکێ د پرێس کۆنفرانسەکی دا ئاشکرا کر کو رێڤەبەریا وان ھەر ژ رۆژا ١٨/٣/٢٠٢١ ھەتا رۆژا ٢٦/٣/٢٠٢١ ئامارا ھاتنا گەشتیاران ل رۆژێن جەژنا نەورۆزێ بۆ پارێزگەھا دھۆکێ وەرگرتیە و ددەمێ ڤان رۆژێن ئامار ھاتیە وەرگرتن ١٨ ھزار و ٨٨٨ گەشتیاران سەرەدانا پارێزگەھا دھۆکێ کربوو ژوان ١٢٠٣٦ یێن باژێرێ میسل و پارێزگەھێن ژێری و ناڤەڕاستا عیراقێ بوون و شەش ھزار و ٨٥٢ یێن باکوورێ کوردستانێ بوون و گۆت: "ھەکە رێژا تووشبوویان ب ڤایۆسێ کۆرۆنایێ بەر ب زێدەبوونێ نەچووبا و قەدەغەیا ھاتنوچوونێ ل پارێزگەھێن عیراقێ نەھاتبا ڕاگەھاندن بێ گۆمان دا رێژەکا مەزنتر یا گەشتیاران سەرەدانا پارێزگەھا دھۆکێ کەن".
ناڤھاتی ئاماژە دا وێ چەندێ کو بۆ رۆژێن جەژنا نەورۆزێ رێڤەبەریا وان ١٥ تیم ل سەرانسەری پارێزگەھا دھۆکێ بۆ پێشوازی و خزمەتکرنا گەشتیاران پێک ئینابوون و ڤان تیما ل زالگەھێن گەشتیار تێدا دھاتنە د ناڤ پارێزگەھا دھۆکێ دا ئاڤ و شریناھی و پروشەر ل سەر گەشتیاران بەلاڤ دکرن ھەروەسا د سێ رۆژێن جەژنا نەورۆزێ ژی دا ئەڤ تیمە ل وان جھان راوەستیابوون یێن کو گەشتیار و سەیرانی دچوونێ و کیسێن نایلونی بۆ ھاڤێتنا بەرمایکان ل سەر وان بەلاڤ دکرن د ھەمان دەم دا داخواز ژێ دکر پێگیریێ ب مەرج و رێنمایێن ساخلەمیێ بکەن بۆ خۆ پاراستن ژ ڤایرۆسێ کۆرۆنایێ و ھەروەسا ژینگەھا جوان یا پارێزگەھا دھۆکێ ژی بپارێزن.
رێوار محەمەد رەشید
