وەزارەتی پەروەردەی حکومەتی هەرێمی کوردستان بڕیاری دا تا ٨ی نیسان قوتابخانەکان نەکرێنەوە

هەولێرـKDP.infoـ وەزارەتی پەروەردەی حکومەتی هەرێمی کوردستان پاڵپشت بەو دەسەڵاتەی پێیان دراوە لە کۆبوونەوەی لێژنەی باڵای ڕووبەڕووبونەوەی کۆرۆنا، بە هۆکاری زیادبوونی ڕێژەی توشبوون و مردن بە ڤایرۆسی کۆرۆنا (کۆڤید ۱۹) چەند بڕیارێکی دا، لەوانە تا ٨ی نیسانی ۲۰۲۱ قوتابخانەکان ناکرێنەوە.

دەقی ڕاگەیەنراوەکە:

پاڵپشت بەو دەسەڵاتەی پێمان دراوە لە کۆبوونەوەی لیژنەی باڵای ڕووبەڕووبونەوەی کۆرۆنا لە ڕێکكەوتی  ١ی ٣ی ٢٠٢١ و، لە کۆبوونەوەی ئەمڕۆ پێنجشەممە ڕێککەوتی ٢٥ی ٣ی ٢٠٢١، وەزیری پەروەردە و بریکاری وەزارەت و بەڕێوەبەری گشتیی پەروەردەی پارێزگاکان، لەبەر زیادبوونی ڕێژەی تووشبوون و مردن بە ڤایرۆسی کۆرۆنا، ئاماژە بە هەڵسەنگاندنی تەندروستی بڕیار درا :

١-‌ جگە لە قۆناغی ١٢ی ئامادەیی و پەیمانگاکانی سەر بە وەزارەتی پەروەردە (حکومی - ناحکومی) سەرجەم قۆناغەکانی دیکەی خوێندن دەوام تا ڕێککەوتی ٨ی ٤ی ٢٠٢١، تەنها بۆ ئەنجامدانی هەڵسەنگاندنی بازنەی یەکەم و تاقیکردنەوەکانی (٢٠) نمرەی نووسینەکی لە قوتابخانە حکومییەکان و تاقیکردنەوەی کۆتاییی وەرز لە قوتابخانە ناحکومییەکان دەبێت. پاشان لە کۆبوونەوەی لیژنەی باڵای کۆرۆنا هەڵسەنگاندنی نوێ بۆ دۆخی تەندروستی دەکرێتەوە.

٢- هەموو ئەو قوتابخانە حکومیانەی هەڵسەنگاندنی بازنەی یەکەم و تاقیکردنەوەی (٢٠) نمرەی نووسینەکییان کردووە دەوامیان  تا ٨ی ٤ی ٢٠٢١ ڕادەگیرێت .

فایزە کۆیی