ساخلەمیا دهۆكێ ئامارا بوویەرێن رۆژین جەژنا نەورۆزی دیار دكەت
دھۆک-KDP.info- بەرپرسێ راگەھاندنێ ل رێڤەبەریا گشتی یا ساخلەمیێ ل پارێزگەھا دھۆکێ ئاشکرا کر کو ئەو پلانا ساخلەمیا پارێزگەھا دھۆکێ بۆ رۆژێن جەژنا نەورۆزێ دانایی ب شێوەیەکێ گەلەک باش ھاتە بجھئینان و گۆت: "د رۆژێن جەژنا نەورۆزێ دا٢١ کەسان گاز ڤەخواریە و د ھەمان جەژن دا ٥٥ حالەتێن سۆتنێ ل پارێزگەھا دھۆکێ ھاتینە تۆمارکرن".
حەمزە رەزیکی، بەرپرسێ راگەھاندنێ ل رێڤەبەریا گشتی یا ساخلەمیا پارێزگەھا دھۆکێ د پرێس کۆنفرانسەکی دا ئاشکرا کر کو د رۆژێن جەژنا نەورۆزێ دا ٢٨ کەس ل پارێزگەھا دھۆکێ ژ بلنداھیان کەفتینە خوارێ و ئێک کەس برینداربوویە، ھەروەسا ٢١٢ زارۆک ژ دایکبووینە ژوان ١٠٨ کچ و ١٠٤ کور بووینە و ٤٧ نشتەرگەری دگەل نەهـ قەستەرێن ب لەز یێن دلی ھاتینە ئەنجامدان و گۆت: "د رۆژێن جەژنا ناڤھاتی دا تیمێن ١٢٢ شیاینە ٥١٢ سەرەدانان ئەنجام بدەن ژ کەفتن و سۆتن و بلندبوونا فشارا خوینێ و شەکرێ و ئێشانێن زکی و چەندین نەخۆشین دی چارەسەر کرینە و ٤٠ ژوان د دەمێ سەیرانان دا بۆ دەزگەھێن ساخلەمیێ ھاتینە ڤەگوھاستن".
ناڤھاتی ئاماژە دا وێ چەندێ کو د سێ رۆژێن جەژنا نەورۆزێ دا دو ھزار و ٩٠٤ کەسان سەرەدان بۆ پشکێن تەنگاڤیان کریە ل نەخۆشخانێن پارێزگەھا دھۆکێ و ٣٨ کەس تووشی روودانێن ھاتنوچوونێ بووینە و ٤٦٨ کەس ل دەزگەھێن ساخلەمیێ ھاتینە نڤاندن و گۆت: "زێرەڤانیا ساخلەمیێ ١٤ جهـ ژ بەر نەپێگێریێ ب رێنمایان سزاداینە، ھەروەسا ھۆشداری ژی داینە ٢٤ جھان".
رێوار محەمەد رەشید
