چار تاوەرێن نوی دێ ل دھۆکێ ھێنە چێکرن
دھۆک-KDP.info- سکرتێکرێ رۆژنامەڤانیێ پارێزگارێ دھۆکێ ئاشکرا کر کو کۆمبوونا لیژنا تاوەران ل پارێزگەھا دھۆکێ ئەڤرۆ رۆژا سێشەمبی ١٦/٣/٢٠٢١ ب سەرپەرشتیا (د.عەلی تەتەر) پارێزگارێ دھۆکێ ھاتە ئەنجامدان و پرۆژێ چێکرنا چار تاوەران ل پارێزگەھا دھۆکێ ھاتە پەسەندکرن.
مللەت عسمەت، سکرتێرێ رۆژنامەڤانی یێ پارێزگارێ دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو د کۆمبوونا ئەڤرۆ یا لیژنا تاوەران دا ل پارێزگەھا دھۆکێ ھەلسەنگاندنا پرۆژێن تاوەران یێن کو بەری نوکە ھاتینە پێشکێشکرن ھاتەکرن و د چارچۆڤێ ڤێ کۆمبوونێ دا بەحسێ چەوانیا قووناغێن بجھئینانێ و وەرگرتنا مۆلەتان و ئەرد و دەوروبەرێن تاوەران ھاتەکرن.
ناڤھاتی ئاماژە دا وێ چەندێ کو د ھەمان کۆمبوون دا دانوستاندن ل دۆر وان پرۆژێن بۆ لیژنا تاوەران ھاتینە پێشکێشکرن ھاتەکرن و ژ سەرجەمێ شەش پرۆژێن ھاتینە پێشکێشکرن، چار پرۆژێن تاوەران ھاتنە پەسەندکرن و دوو پرۆژێن دی ژی ھاتنە پاشخستن بۆ وێ چەندێ دووبارە ھەلسەنگاندن بۆ بھێتەکرن.
رێوار محەمەد رەشید
