ب ھەلکەفتا (١٤)ی ئادارێ کەرنەڤالەکێ جەماوەری ل دھۆکێ ھاتە ئەنجامدان
دھۆک-KDP.info- ب ھەلکەفتا (١٤)ی ئادارێ رۆژا ژدایکبوونا بابێ روحی یێ نەتەوا کورد (بارزانیێ نەمر) و سەرھلدانا باژێرێ دھۆکێ ئەڤرۆ رۆژا ١٤/٣/٢٠٢١ کەرنەڤالەکێ جەماوەری ژ لایێ دەزگەھێ پاراستنا ئالایێ کوردستانێ ڤە بۆ سەرێ چیایێ کێلیا (شەدا)ی ل دھۆکێ ھاتە رێکخستن.
پەلەوان شێخ مەمی، بەرپرسێ گشتی یێ دەزگەھێ پاراستنا ئالایێ کوردستانێ بۆ مالپەڕێ فەرمیێ پارتی دیموکراتی کوردستان ئاشکرا کر کو بۆ دەمێ ھەشت سالانە دەزگەھێ پاراستنا ئالایێ کوردستانێ ب ھەلکەفتا (١٤)ی ئادارێ رۆژا ژدایکبوونا بابێ روحی یێ نەتەوا کورد (بارزانیێ نەمر) و سەرھلدانا باژێرێ دھۆکێ ئالایێ کوردستانێ ل کێلیا (شەدا)ی ل باژێرێ دھۆکێ ب شێوەیەکێ خۆبەخش بوویاغ دکەت، بەلێ ئەڤ سالە مەزاختیێن کرینا بوویاغێ بۆ ئالایێ پیرۆزێ کوردستانێ ل کێلیا ناڤھاتی ژ لایێ ئافرەتەکا پەنابەرا رۆژئاڤایێ کوردستانێ ڤە ب ناڤێ (دەیکا عەگید)ی ھاتبوونە دابینکرن و ب ھەمان ھەلکەفت ئەڤرۆ وان کەرنەڤالەکێ جەماوەری ژی ئەنجام دا و گۆت: "بۆ دەمێ چەندین سالان پێشمەرگێن قەھرەمان ل سەرێ چیایێن کوردستانێ بەرەڤانی ژ ئاخا پیرۆزا کوردستانێ کریە ژ بەر ڤێ چەندێ ئەڤرۆ ژمارەکا بەرچاڤا خەلکی ژ ھەمی ئایین و لایەنێن سیاسی یێن د ناڤ ھەرێما کوردستانێ دا پشکداری د ڤی کەرنەڤالی دا کر و ل سەرێ چیایێ کێلیا (شەدا)ی ل باژێرێ دھۆکێ ئامادەبوون".
ناڤھاتی ئاماژە دا وێ چەندێ کو د رێورەسمێن ئەنجامدانا ڤی کەرنەڤالی دا چەندین پەیڤ و ھەلبەست ھاتنە خواندن، ھەروەسا ئەو ئافرەتا مەزاختیێن بوویاغکرنا ئالایێ کوردستانێ دابینکرین ژ لایێ دەزگەھێ پاراستنا ئالایێ کوردستانێ ڤە ھاتە خەلاتکرن.
رێوار محەمەد رەشید
