رێکەفتنەک دناڤبەرا پارێزگەھا دھۆکێ و باژێرێ گێینزڤیل یێ ئەمریکی دا ھاتە ئیمزاکرن
دھۆک -KDP.info- د روونشتنەکا ئۆنلاین دا ئەڤرۆ رۆژا ٨/٣/٢٠٢١ ب پشکداریا (د.عەلی تەتەر) پارێزگارێ دھۆکێ و چەندین رێڤەبەرێن گشتی یێن سازیێن میری و زانکۆیێن پارێزگەھا دھۆکێ، رێکەفتنەک دناڤبەرا پارێزگەھا دھۆکێ و باژێرێ گێینزڤیل یێ ویلایەتێن ئێکگرتی یێن ئەمریکا دا ھاتە ئیمزاکرن.
د. عەلی تەتەر، پارێزگارێ دھۆکێ د پرێس کۆنفرانسەکی دا ئاشکرا کر کو پارێزگەھا دھۆکێ ئەڤرۆ ئەڤ رێککەفتنە ب مەرەما بھێزکرنا پەیوەندیێن دوقۆلی د بوارێن کەلتۆری و جڤاکی و ئابووری و شینواری و پەروەردێ و ساخلەمیێ دگەل باژێرێ گێینزڤیل یێ ویلایەتێن ئێکگرتی یێن ئەمریکا ئیمزا کر و گۆت: "ئەڤ رێکەفتنە دێ بۆ دەمێ پێنج سالان یا بەردەوام بیت و سالانە ئەم دێ بەرنامێ خوە یێ کاری د ڤان بیاڤێن مە ئاماژە پێکری دانین، ھەروەسا ئەم یێ بزاڤان دکەین ل پاشەرۆژێ پارێزگەھا دھۆکێ ب خەلکەکێ دی ژی بدەینە نیساسین بۆ وێ چەندێ پتر لێک نێزیک بوون دناڤبەرا مە دا پەیداببیت".
ناڤھاتی ئاماژە دا وێ چەندێ کو ژوورا ئۆپەراسیۆنا بەرھەنگاربوونا کۆرۆنایێ ل رۆژا ١٠/٣/٢٠٢١ دێ کۆمبوونەکا دی ل دۆر رەوشا کۆرۆنایێ ل پارێزگەھا دھۆکێ ئەنجامدەت و گۆت: " ھەمی بیرەوەریێن ھەیڤا ئادارێ ل پارێزگەھا دھۆکێ دێ بلند ھێنە راگرتن، بەلێ چو کۆمبوونێن جەماوەری ناھێنە ئەنجامدان و دخوازین خەلکێ مە زێدەتر پێگیریێ ب مەرج و رێنمایێن ساخلەمیێ بکەن".
رێوار محەمەد رەشید
