رۆژا جیھانیا ئافرەتان دێ ل ھەرێمێ ھێتە ساخکرن
دھۆک-KDP.info- سکرتێرا ئێکەتیا ئافرەتێن کوردستانێ ئاشکرا کر کو ل ژێر درووشمێ (خودانەتیا بەرھەم و بڕیارێ مافێ من ژی یە) رۆژا جیھانیا ئافرەتان سوبەرھی رۆژا دووشەمبی ٨/٣/٢٠٢١ دێ ب ئەنجامدانا چەندین چالاکیان ل سەرانسەری ھەرێما کوردستانێ ھێتە ساخکرن.
د. ڤیان سلێمان، سکرتێرا ئێکەتیا ئافرەتێن کوردستانێ بۆ مالپەرێ فەرمیێ پارتی دیموکراتی کوردستان ئاشکرا کر کو ئەڤ سالە ژ بەر بەلاڤبوونا ڤایرۆسێ کۆرۆنایێ و گرتنەبەرا رێکارێن ساخلەمیێ بۆ خۆ پاراستن ژ ڤی ڤایرۆسی ئەو نەشێن ب شێوەیەکێ بەرفرەە کاروچالاکیێن خوە ب ھەرلکەفتا رۆژا جیھانیا ئافرەتان ئەنجام بدەن، بەلێ سەرەرایی ڤێ چەندێ وان بەرنامە و پلانەکا باش بۆ ڤێ ھەلکەفتێ دانایە کو چەندین کار و چالاکیان ل ژێر گرتنەبەرا رێکارێن ساخلەمیێ ل سەرانسەری ھەرێما کوردستانێ ئەنجام بدەن.
د. ڤیانێ و گۆت: "سوبەھی ل دەمژمێر ١١:٠٠ بەری نیڤرۆ دێ پەیاما ئێکەتیا ئافرەتان ژ لایێ ئەنجومەنێن ئافرەتان ڤە ھەمی باژێر و باژارۆکێن ھەرێما کوردستانێ ھێتە بەلاڤکرن کو دێ وێ پەیامێ ئاراستەیی زەلامان کەین، ھەروەسا د ناڤ بازاران و جھێن گشتی دا دێ پۆستەرێن دەربڕینێ ژ ڤێ ھەلکەفتێ دکەن ل سەر زەلامان بەلاڤ کەین سەرەرایی ڤێ چەندێ ھندەک خۆلێن پیشەیی بۆ ئافرەتان دێ ھێنە ڤەکرن و ھەتا رۆژا ٣١/٥/٢٠٢١ دێ د بەردەوام بن، زێدەباری ڤێ چەندێ چەندین سمینار ب شێوەیێ ئۆنلاین دێ ھێنە پێشکێشکرن و چەندین پەنەلێن جوراوجور و دیدارێن ئافرەتان ژی دێ ھێنە ئەنجامدان، د ھەمان دەم دا چەندین پێشانگەھێن شێوەکاری و کارێن دەستی یێن ئافرەتان ژی دێ ھێنە ڤەکرن".
ناڤھاتیێ ئاماژە دا وێ چەندێ کو ھەر د چارچۆڤێ ڤان کار و چالاکیان دا دێ بازارێ حەفتیێ یێ ئافرەتان ل بەرامبەر پارکا شانەدێر ل ھەولێرێ ھێتە ڤەکرن و ژ نوکە وێڤە ئەڤ بازارە دێ ل ھەمی رۆژێن چارشەمبی ھەبیت و ھەر ئافرەتەکێ دێ ماف ھەبیت بەرھەمێ خۆ چو خوارن بیت یان کارێ دەستی بیت یان ھەر تشتەکێ دی کو بەرھەمێ وێ بیت دڤی بازاری دا نیشابدەت و ب فرۆشیت و گۆت: "ئێکەتیا ئافرەتێن کوردستانێ دێ سەرپەرشتیا ڤی بازاری کەت".
رێوار محەمەد رەشید
