پارێزگاری ھەولێر: بێ جیاوازی خزمەتی ھاووڵاتیان دەكەین

هەولێر-KDP.info- پارێزگاری ھەولێر، ئەمڕۆ سەردانی بەشێك لە لایەنە سیاسییەكانی شاری ھەولێری كرد و، لە كۆنگرەیەكی رۆژنامەوانیدا ئاشكرای كرد: "بە بێ جیاوازی خزمەتی خەڵكی سنووری پارێزگای ھەولێر دەكەین".

ئومێد خۆشناو، لە كۆنگرەیەكی رۆژنامەوانیدا لە دوای سەردانی مەڵبەندی سێی یەكێتی لە ھەولێر، رایگەیاند: "لە سەردانی ئەمڕۆماندا بۆ مەڵبەندی یەكێتی، باس لە كارنامەی ئایندەی خۆمان و كار و خزمەتكردن بە سنووری پارێزگای ھەولێر كرا، كە ئێمە دەمانەوێ دڵنیایی بدەینە لایەنە سیاسییەكان بۆ ئەوەی بتوانین بە ھەموومان خزمەتی ھاووڵاتیان بكەین".

پارێزگاری ھەولێر گوتیشی: "دەمانەوێ لاپەڕەیەكی تازە لە كاری خزمەتگوزاری و حوكمڕانی لە شاری ھەولێر دەست پێبكەین، كاری ئێمەش حزبایەتی نییە، دەمانەوێ لایەنە سیاسییەكان ھاوكارمان بن، بە تایبەتی ئەو ھێزانەی بەشدارن لە حكوومەتدا و ھەموومان پشتیوانی لە كارنامەی حكوومەتی ھەرێمی كوردستان بكەین، كە رێككەوتنی لەسەر ئەنجام دراوە".

خۆشناو روونیشی كردەوە: "ئەو قسانەی لە كۆبوونەوەی ئەمڕۆدا كراون، لە رۆژانی داھاتوودا بە كردار دەیبینین لە پێناو خزمەتكردنی ھاووڵاتیانی ھەولێر".

لەبارەی سكاڵای مەحموود سەنگاوی لەسەر ئومێد خۆشناو، پارێزگاری ھەولێر دەڵێت: "پێشتر مەحموود سەنگاوی سكاڵای لەسەر من ھەبووە و ئەگەر رێكاری یاسایی بگیرێتە بەر، ئەوا من ئامادەی بەردەم دادگا دەبم و كەسمان لە سەرەوەی یاسا نین".

 

قائید میرۆ