ڕازەمەندی ل سەر چێکرنا ٢٤ پرۆژێن کارگەھێن پیشەسازی ل دھۆکێ ھاتەکرن
دھۆک-KDP.info- سکرتێرێ رۆژنامەڤانیێ پارێزگارێ دھۆکێ دیار کر کو کۆمبوونا لژنا پیشەسازیی ل پارێزگەھا دھۆکێ ئەڤرۆ رۆژا ٢٠٢١/٢/١٨ ب سەرپەرشتیا “د.عەلی تەتەر” پارێزگارێ دھۆکێ ب ئامادەبوونا رێڤەبەریێن پەیوەندیدار و ئەندامێن لژنێ ھاتە ئەنجامدان.
مللەت عسمەت، سکرتێرێ رۆژنامەڤانیێ پارێزگارێ دھۆکێ بۆ ماڵپەرێ فەرمیێ پارتی دیموکراتی کوردستان دیار کر کو د کۆمبوونا لژنا پیشەسازیی یا پارێزگەھا دھۆکێ دا پشتی دانوستاندن ل سەر پرۆژێن کارگەھێن داخوازا رازەمەندیێ کری ھاتیەکرن، ڕازەمەندی ل سەر دانانا ٢٤ کارگەھان د بوارێن خوارنێ و ئاری، کەرەستێن ئاڤاکرنێ، بەرھەمئنانا کلینس و پەمبی، بەرھەمئینانا جورێن بوریێن ئاسنی، داگرتنا بوتلێن غازا شل، نەخشکرنا شیشەیی ھاتەکرن.
ناڤھاتی ئاماژە دا وێ چەندێ کو پارێزگارێ دھۆکێ د ڤێ کۆمبوونێ دا دووپاتی ل وێ چەندێ کر کو ئاسانکاری دێ ل دووڤ رێنمایان و یاسایێ بۆ ڤان پرۆژان ھێتەکرن ژ پێخەمەت پێشڤەبرنا کەرتێ پیشەسازی ل پارێزگەھا دھۆکێ. رێوار محەمەد رەشید
