سال رۆژا دامەزراندنا ئێکەتیا لاوان دێ ل ھەرێمێ ھێتە ساخکرن
دھۆک-KDP.info- سکرتێرێ ئێکەتیا لاوێن دیموکراتا کوردستانێ ئاشکرا کر ب ھەلکەفتا ١٨ شواتێ سال رۆژا سال رۆژا دامەزراندنا ئێکەتیا لاوێن دیموکراتا کوردستانێ دەست ب ئەنجامدانا چەندین چالاکیێن جوراوجور ل سەرانسەری ھەرێما کوردستانێ ھاتیەکرن و ئەڤ چالاکیە ھەتا رۆژا ١/٣/٢٠٢١ دێ د بەردەوام بن.
مەیسەر عوبەید، سکرتێرێ ئێکەتیا لاوێن دیموکراتا کوردستانێ بۆ مالپەرێ فەرمیێ پارتی دیموکراتی کوردستان دیار کر کو ب ھەلکەفتا ١٨ شواتێ سال رۆژا دامەزراندنا ھەر دو رێکخراوێن پێشەنگ ئێکەتیا لاوێن دیموکراتا کوردستانێ و ئێکەتیا قوتابیێن کوردستانێ ئەو پیرۆزباھیێ ل ھەمی ئەندام و کادرێن لاوان و قوتابیان دکەت و گۆت: "ب مخابنی ڤە ژ بەر بەلاڤبوونا ڤایرۆسێ کۆرۆنایێ ئەڤ سالە ئەم نەشێن وەکو پێدڤی چالاکیان ب ڤێ ھەلکەفتێ ئەنجام بدەین، بەلێ ل دووڤ رێنمایێن ساخلەمیێ ئەم وەکو ئێکەتیا لاوێن دیموکراتا کوردستانێ شیاینە بەرنامەکێ تێر و تەسەل بۆ ئەنجامدانا چەندین چالاکیێن جوراوجور ب ڤێ ھەلکەفتێ ل سەرانسەری ھەرێما کوردستانێ بدانین ژ وان ژی چەندین چالاکیێن وەرزشی و ھونەری و رەوشەنبیری و شانۆگەریێن ل سەر جاددان و ھتد... دێ ھێنە ئەنجامدان".
ناڤھاتی ئاماژە دا وێ چەندێ کو ئەڤ چالاکیە ژ رۆژا ١٠/٢/٢٠٢١ یێن دەستپێکرین و ھەتا ١/٣/٢٠٢١ دێ د بەردەوام بن و ل رۆژا ١٧/٢/٢٠٢١ ب ھەمان ھەلکەفت ئەندام و کادرێن ئێکەتیا لاوێن دیموکراتا کوردستانێ دێ ھەوەکا خوین بەخشینێ بۆ وان کەسێن پێدڤی ب خوینێ دبن ئەنجام دەن، ھەروەسا ل رۆژێن دووڤ دا ژی دێ چەندین چالاکیێن دی ھێنە ئەنجامدان و بۆ دەمێ ١٠ رۆژان شانۆگەریەک ب ناڤێ (نیشیتمان) دێ ل سەرانسەری کوردستانێ ھێتە نیشاندان کو ئەڤ شانۆگەریە دەربڕینێ ژ حەزژێکرنا وەلاتی دکەت".
رێوار محەمەد رەشید
