ئەڤرۆ جێگرێ پارێزگارێ دهۆکێ و سێ رێڤەبەرێن ناحیان دەست بکاربوون

دهۆک-KDP.info- د رێورەسمەکی دا ئەڤرۆ رۆژا 7/2/2021 ب ئامادەبوونا (د.عەلی تەتەر) پارێزگارێ دهۆکێ، جێگرێ نوی یێ پارێزگارێ دهۆکێ و رێڤەبەرێن هەر ئێک ژ ناحیێن (بامەرنێ، دەرکارێ، رۆڤیا) ل سنوورێ پارێزگەها دهۆکێ دەست بکاربوون.

مللەت عسمەت، سکرتێرێ رۆژنامەڤانیێ پارێزگارێ دهۆکێ بۆ ماڵپەرێ فەرمیێ پارتی دیموکراتی کوردستان ئاشکرا کر کو د چارۆڤێ گوهۆرینێن بەردەوامێن کارگێری دا یێن کو ل سنوورێ پارێزگەها دهۆکێ دهێنە ئەنجامدان (شەمعون شلیمون ئیشۆ) وەکو جێگرێ پارێزگارێ دهۆکێ دەست بکاربوو و گۆت: "سێ کەسان خوە بۆ پۆستێ جێگری پارێزگارێ دهۆکێ بەربژارکربوو کو ئەڤ پۆستە بۆ پێکهاتا کریستیانانە، بەلێ ناڤێ ناڤهاتی وەکو ناڤێ ئێکێ هاتبوو بلندکرن و ب دەرچوونا فەرمانا جڤاتا وەزیرێن حکومەتا هەرێما کوردستانێ ئەڤرۆ دەست بکاربوو".

ناڤهاتی ئاماژە دا وێ چەندێ کو د هەمان رێورەسم دا هەر ئێک ژ (میران عەبدوللا تاها) وەکو رێڤەبەرا نوی یا ناحیا (بامەرنێ) ل جهێ (حمید زبیر) دەست بکاربوو، هەروەسا (ئەدیب جەعفەر مستەفا) وەکو رێڤەبەرێ نوی یێ ناحیا (دەرکارێ) ل جهێ  (زێرەڤان موسا) دەست بکاربوو، دیسان د هەمان دەم دا (عنتەر فەرهاد محەمەد) وەکو رێڤەبەرێ نوی یێ ناحیا (رۆڤیا) ل جهێ (قاسم عەبدولسەمەد) دەست بکاربوو و گۆت: "ئەڤ رێڤەبەرێن ناحیان یێن کو ئەڤرۆ دەست بکاربووین بەری نوکە هاتبوونە بەربژارکرن و ل رۆژا 2/12/2020 ژ لایێ جڤاتا پارێزگەها دهۆکێ ڤە هاتبوونە پەسەندکرن، ئەڤە ددەمەکی دایە کو بەری نوکە رێڤەبەریێن هەر سێ ناحیێن ناڤهاتی ژ لایێ یەکگرتوویا ئیسلامیا کوردستانێ ڤە دهاتنە برێڤەبرن".

 

رێوار محەمەد رەشید