كەنعان خەیلانی: ئومێد خۆشناو و دوو كەسی دیكەش كاندید كراون
ھەولێر-KDP.info- سەرۆكی فراكسیۆنی پارتی دیموكراتی كوردستان لە ئەنجومەنی پارێزگای ھەولێر گوتی، بڕیارە رۆژی دووشەممە سەعات ١٠ی بەیانی، ئەنجومەنی پارێزگای ھەولێر كۆببێتەوە و تێیدا دەنگ لەسەر كاندیدی نوێی پارێزگاری ھەولێر بدرێت، فراكسیۆنی پارتی دیموكراتی كوردستانیش (ئومێد خۆشناو)ی كاندید كردووە.
كەنعان خەیلانی، بۆ ماڵپەڕی فەرمیی پارتی دیموكراتی كوردستان رایگەیاند: "دوای راگەیاندنی كاندیدكردنی كەسێك بۆ پۆستی پارێزگاری ھەولێر بەپێی یاسا، ھەفتەیەك بۆ ھەموو خەڵكی سنووری ھەولێر دەرگای كاندیدكردن كرایەوە، كە سیڤی پێشكەش بكەن و، ئێمەش (ئومێد خۆشناو)مان كاندید كرد و ناوەكەمان ئاراستەی سەرۆكایەتیی ئەنجومەنی پارێزگای ھەولێر كرد وەكو كاندیدی فراكسیۆن و، دوو كەسی دیكەش كاندید كراون".
خەیلانی گوتیشی، بڕیارە رۆژی دووشەممەی داهاتوو، ئەنجومەنی پارێزگای ھەولێر كۆببێتەوە و دەنگدان لەسەر كاندیدی پارێزگاری نوێی ھەولێر دەدرێت و پرۆسەكەش سەعات ١٠ی بەیانی بەڕێوە دەچێت.
پارتی دیموكراتی كوردستان، (ئومێد خۆشناو) سەرۆكی فراكسیۆنی پارتی لە پەرلەمانی كوردستان، بۆ پارێزگاری نوێی ھەولێر كاندید كردووە.
بڵند ئیبراھیم
