د سالا بۆری دا ٧٠٠ کەس ل پارێزگەھا دھۆکێ تووشی نەخۆشیا پەنجەشێرێ بووینە
دھۆک-KDP.info-رێڤەبەرێ سەنتەرێ ئازادی یێ نەخۆشیێن پەنجەشێرێ ل پارێزگەھا دھۆکێ دیار کر کو رێژا تووشبوویان ب نەخۆشیا پەنجەشێرێ ل پارێزگەھا دھۆکێ بەر ب ب کێمبوونێ چوویە کو د سالا بووری دا ٧٠٠ کەس ل پارێزگەھا ناڤھاتی تووشی نەخۆشیا پەنجەشێرێ ببوون.
د. زەکی عەلی، رێڤەبەرێ سەنتەرێ ئازادی یێ نەخۆشیێن پەنجەشێرێ د کونگرەکێ رۆژنامەڤانی دا ئاشکرا کر کو د سالا ٢٠١٩ ێ دا ھزار و ٣١٠ کەس ل پارێزگەھا دھۆکێ تووشی نەخۆشیا پەنجەشێرێ ببوون ژ وان ٥٩٥ زەلام بوون و ٧١٥ ئافرەت بوون، بەلێ د سالا ٢٠٢٠ێ دا ئەڤ رێژە بەر ب کێمبوونێ ڤە چوویە کو د سالا بۆری دا ٧٠٠ کەس ل پارێزگەھا دھۆکێ تووشی نەخۆشیا ناڤھاتی بوون ژ وان ٣٥٨ زەلام بوون و ٣٤٢ ئافرەت بوون و گۆت: "د ھەمان سال دا ٢٩٢ نەخۆشێن پەنجەشێرێ ل پارێزگەھا دھۆکێ گیانێ خوە ژ دەست دایە".
ناڤھاتی ئاماژە دا وێ چەندێ کو پرۆژەک ھاتیە بەرھەڤکرن کو سەنتەرێ چاندنا مەژیێ ھەستی ل پارێزگەھا دھۆکێ بھێتە ئاڤاکرن و گۆت: "سەنتەرەکێ دی بۆ نەخۆشێن پەنجەشێرێ دێ ل پارێزگەھا دھۆکێ ھێتە چێکرن و پارە ژی بۆ ڤێ مەرەمێ ھاتیە تەرخانکرن".
رێڤەبەرێ سەنتەرێ ئازادی یێ نەخۆشیێن پەنجەشێرێ خویا کر کو د سالا بۆری دا خزمەتێن جوراوجور ژ لایێ سەنتەرێ وان ڤە پێشکێشی پتری ١٤ ھزار نەخۆشان ھاتینەکرن و گۆت: "ئەو نەخۆشێن پێدڤی ب چاندنا مەژیێ ھەستی دبن ل سەر ئەرکێ حکومەتا ھەرێما کوردستانێ بۆ دەرڤەی وەلاتی دھێنە رەوانەکرن، ھەروەسا سندوقا نەخۆشیا پەنجەشێرێ ل ھەرێما کوردستانێ گەلەک خزمەتا خەلکی دکەت بۆ دابینکرنا دەرمانان".
رێوار محەمەد رەشید
