ساخلەمیا دھۆکێ: د سالا بوری دا پتری ٣٤ ھزار نشتەرگەریان ل نەخۆشخانێن دھۆکێ ھاتینە ئەنجامدان
دھۆک-KDP.info- بەرپرسێ ڕاگەھاندنێ ل رێڤەبەریا گشتی یا ساخلەمیێ ل پارێزگەھا دھۆکێ ئاشکرا کر کو د سالا بۆری دا پتری ٣٤ ھزار نشتەرگەریان ل نەخۆشخانێن حکومی یێن پارێزگەھا دھۆکێ ھاتینە ئەنجامدان و گۆت: "د ھەمان سال دا ٧٤ ھزار و٤٠٠ تەنێن کەرەستێن ھشک ھاتینە ژناڤبرن".
حەمزە رەزیکی، بەرپرسێ ڕاگەھاندنێ ل رێڤەبەریا گشتی یا ساخلەمیێ ل پارێزگەھا دھۆکێ ئەڤرۆ رۆژا ٢٥/١/٢٠٢١ د پرێس کۆنفرانسەکی دا دیار کر کو د سالا بوری دا دوو ملیۆن و ٧٨٢ ھزار و ٤٥ کەسان ب مەرەما وەرگرتنا چارەسەریێ قەستا ساخلەمیا دھۆکێ کرینە ژ وان پتری ١١٣ ھزاران ل نەخۆشخانێ ھاتینە نڤاندن و ٣٤ ھزار و ٤٣٠ نشتەرگەریێن جۆراوجۆر ھاتینە ئەنجامدان، ھەروەسا د ھەمان سال دا ٤٦٢ جھـ ژ بەر پێنەگێریێ ب رێنمایێن ساخلەمیێ ھاتینە سزادان و گۆت: "د سالا ٢٠٢٠ێ دا ٣٤ ھزار و٢١٢ زارۆک ل پارێزگەھا دھۆکێ ژدایکبووینە ژوان ١٧ ھزار و ٣٢٢ کور بووینە و ١٦ھزار و ٨٩٠ کچ بووینە".
ناڤھاتی ئاماژە دا وێ چەندێ کو ل سالا بۆری پێنج نەخۆشخانە بۆ توشبوویێن کۆرۆنایێ ل پارێزگەھا دھۆکێ ھاتبوونە تەرخانکرن و ٦٨٢ کەسان ژ بەر نەخۆشیا کۆرۆنایێ گیانێ خوە ژ دەست دابوو و ٢١ ھزار و ٨٦٩ کەس ژ نەخۆشیا ناڤھاتی بتەمامی چارەسەرببوون و گۆت: "د ھەمان سال دا ھەشت ھزار و ٨٨٥ روونشتنێن شووشتنا گۆلچیسکان ھاتینە کرن، ھەروەسا ٤٣ نشتەرگەریێن چاندنا گۆلچیسکان و١٦١ نشتەرگەریێن دلی و ھزار و ٣٣٠ قەستەرێن دلی و بۆ نەخۆشان ھاتینەئەنجامدان.
رێوار محەمەد رەشید
