حکومەتا ئەلمانیا هنده‌ك پێدڤیێن ساخلەمیێ پێشکێشی پارێزگەھا دھۆکێ کرن
دهوك-KDP.info- ب ئامادەبوونا (سڤێن کروسپێ) قۆنسلێ گشتی یێ وەلاتێ ئەلمانیا ل ھەرێما کوردستانێ حکومەتا وەلاتێ ناڤھاتی ئەڤرۆ رۆژا ١٧/١/٢٠٢١ ھژمارەکا پێدڤیێن ساخلەمیێ پێشکێشی پارێزگەھا دھۆکێ کرن.
د. ئەفراسیاب موسا، رێڤەبەرێ گشتی یێ ساخلەمیێ ل پارێزگەھا دھۆکێ د پرێس کۆنفرانسەکێ دا دیار کر کو حکومەتا وەلاتێ ئەلمانیا ئەڤرۆ ب کوژمێ ١٨ ھزار دۆلاران ھژمارەکا پێدڤیێن ساخلەمیێ پێشکێشی ساخلەمیا پارێزگەھا دھۆکێ کرن کو ئەو ھاریکاریە د پێکھاتیبوون ژ پتری ٢٤ ھزار جوتێن دەستگورکان و پتری چار ھزار دانێن سەدریێن کاری و چەندین کەلوپەلێن دی یێن ساخلەمیێ و گرێبەستەک ژی دگەل وەلاتێ ناڤھاتی ھاتە ئیمزاکرن و گۆت: "د ھەیاما بۆری دا حکومەتا وەلاتێ ئەلمانیا چەندین کارمەندێن ساخلەمیا دھۆکێ مەشقداینە و دەستپێشخەریا وان ھەموو دەمان جھێ شانازیێ یە و دخوازم ھەموو رێکخراو و وەلات ھاریکاریا ساخلەمیا دھۆکێ بکەن داکو ڤێ رەوشا نوکە ب سەر مە و ھەموو جیھانێ داھاتی دەرباز بکەین".
ژ ئالیێ خوە ڤە سڤێن کروسپێ، قۆنسلێ گشتی یێ وەلاتێ ئەلمانیا ل ھەرێما کوردستانێ د ھەمان پرێس کونفرانس دا خویا کر کو وەلاتێ ئەلمانیا بەردەوام ھاریکاریان پێشکێشی پارێزگەھا دھۆکێ دکەت چ ب شێوەیێ راستەوخوە یان ژی ب رێیا رێکخراوان و گۆت: "ژ سالا ٢٠١٤ و ھەتا نوکە حکومەتا وەلاتێ ئەلمانیا کۆژمێ ٦٠٠ ملیۆن دۆلار بۆ ھەرێما کوردستانێ مەزاختینە و سەرەرایی ڤێ چەندێ مە دڤێت دەلیڤێن کاری بۆ کەسێن بێ کار پەیدا بکەین".
رێوار محه‌د ره‌شید
