د سالا بۆری دا ب کۆژمێ پتری پێنج ملیار دیناران پرۆژە ل ناحیا زاویتە ھاتینە ئەنجامدان

دھۆک-KDP.info- رێڤەبەرێ ناحیا زاویتە ئاشکرا کر کو د سالا ٢٠٢٠ێ دا ب کۆژمێ پتری پێنج ملیار دیناران پرۆژێن خزمەتگۆزاری ل ناحیا زاویتە یا سەر ب قەزا دھۆکێ ڤە ھاتینە ئەنجامدان و گۆت: "د پلانا مەدایە تۆنێلەک ل بەرامبەر گەلیێ زاویتە بۆ ھاتنوچوونا ترۆمبێلان بھێتە چێکرن و گەلیێ زاویتە بتنێ بۆ ھاتنوچوونا پیادە و وەکو جھەکێ گەشتیاری بهێتە بکارئینان".

مشیر محەمەد بەشیر، رێڤەبەرێ ناحیا زاویتە بۆ مالپەرێ فەرمیێ پارتی دیموکراتی کوردستان ئاشکرا کر کو د سالا ٢٠٢٠ێ دا سەرەرایی ھەبوونا قەیرانان چەندین پرۆژێن جوراوجور یێن خزمەتگۆزاری ل ناحیا زاویتە یا سەر ب قەزا دھۆکێ ڤە ھاتینە ئەنجامدان کو بەھرا پتریا ڤان پرۆژان ژی چێکرنا رێکێن سەرەکی و ناڤخۆیی بوون، ژ وان ژی چێکرن و بەرفرەھکرنا رێکێن گوندێن (باجلورێ، گرێ قەسرۆکا، گەرماڤا، پشت گری، قارقاراڤا، سندورێ، بادێ) ب کوژمێ دوو ملیار و ١٧٠ ملیۆن دیناران سەرەرایی ڤێ چەندێ ریکێن چەندین گوندان ژی پێکڤە ھاتینە گرێدان و سەخبێرکرن، ھەروەسا چەندین رێکێن ناڤخۆ یێن سنوورێ باژێرڤانیێن ناحیا زاویتە ھاتینە تێکەلکرن و چیمەنتۆکرن و گۆت: "ل سالا بۆری ژ بلی سەخبێریکرنا ھندەک قوتابخانان، قوتابخانەکا ١٨ رێزی ژی ل ناحیا زاویتە ب کوژمێ دوو ملیار دیناران ھاتیە چێکرن کو نوکە ئەڤ قوتابخانە ب دویماھی ھاتیە و ژ بەلێندەری ھاتیە وەرگرتن و ل دەمەکێ نێزیک دێ پرۆسا خواندنێ د ناڤ دا دەست پێ کەت".

ناڤھاتی ئاماژە دا وێ چەندێ کو د ھەمان سال دا چەندین ئاریشێن د تۆرێن ئاڤێ یێن سنوورێ ناحیا زاویتە دا ھەین ژ لایێ رێڤەبەریا ئاڤا دھۆکێ ڤە ھاتینە چارەسەرکرن، د ھەمان دەم دا پتری ١٠٠ ملیۆن دیناران د بوارێ کارەبێ ژی دا ل ناحیا زاویتە ھاتینە مەزاختن و گۆت: "ب شێوەیەکێ گشتی ل سالا ٢٠٢٠ ب کۆژمێ پتری پێنج ملیار دیناران پرۆژە ل سنوورێ ناحیا زاویتە ھاتینە ئەنجامدان".

مشیر محەمەدی دیار کر کو بۆ سالا ٢٠٢١ د پلانا وان دایە پتر گرنگیێ ب ڤەکرن و سەخبێریکرنا رێکان ل سنوورێ ھەر سێ باژێرڤانیێن (کورا، باگێرا، زاویتە) بدەن، ھەروەسا ھەر ئێک ژ باژێرڤانیێن ناڤھاتی ب ھەماھەنگیا چەندین رێڤەبەریێن پەیوەندیدار ڤەدیتنەک بۆ پرۆژان کریە و پێشنیارا ئێک ملیار دیناران کریە کو پرۆژێن خزمەتگۆزاری ل سنوورێ ناحیا زاویتە ئەنجام بدەن و گۆت: "سەرەرایی وێ چەندێ کو ناحیا زاویتە نێزیکی قەزا دھۆکێ یە، بەلێ بنگەھێن ساخلەمیێ ل سەنتەرێ ناحیا ناڤهاتی و کومەلگەھێن کۆرا و باگێرا یێن ب سەر وێ ڤە ھەنە و مە پێشنیارکریە کو بنگەھێن ساخلەمیێ ل گوندێن ئێمینکێ و ئەڤریکێ ژی بھێنە ڤەکرن، ژ بەر کو ھژمارا ئاکنجیێن ڤان ھەر دو گوندان بەر ب زێدەبوونێ ڤە دچن".

رێڤەبەرێ ناحیا زاویتە خویا کر کو د ئەڤ سالە دا وان پیێشنیارا کوژمێ پتری ٥٠٠ ملیۆن دیناران بۆ سەخبێری و گەھاندنا ھێلێن ئاڤێ کریە، ئەڤە د دەمەکی دایە کو ئاریشا ئاڤێ ل گوندێ ئەڤریکێ ژی ل دووڤ شیانان دێ ھێتە چارەسەرکرن، ژ بەر کو ژێدەرێ ئاڤێ یێ ھەی، بەلێ ژ بەر نەبوونا عمبارەکێ وەکو پێدڤی ئاڤ ناگەھیتە مالێن وەلاتیێن گوندێ ناڤھاتی، ھەروەسا ژ بلی خزمەتێن چاندنێ یێن کو رۆژانە پێشکێشی جۆتیارێن دەڤەرێ دھێنەکرن وان دووپاتی ل سەر چێکرنا ٢٠ بەنداڤێن بچووک کریە کو نوکە پتری ھەشت بەنداڤان بۆ مەرەمێن ئاڤدانێ ل سنوورێ ناحیا زاویتە ھەنە، بەلێ وان پێشنیارا سەخبێریا وان ژی کریە". 

ناڤھاتی ئاشکرا کر کو د سالێن بۆری دا پرۆژێن گەشتیاری ل دەڤەرا زاویتە ھاتینە ئەنجامدان، هەروەسا سیمایێ گەلیێ زاویتە ژی ژ سیمایەکێ بازرگانی بۆ سیمایەکێ گۆزاری ھاتیە گوھۆڕین و گۆت: "د پلانا مە دایە تۆنێلەک ل بەرامبەر گەلیێ زاویتە بۆ ھاتنوچوونا ترۆمبێلان بھێتە چێکرن و گەلیێ زاویتە بتنێ بۆ ھاتنوچوونا پیادە و وەکو جھەکێ گەشتیاری بھێتە بکارئینان و پلانەکا باش بۆ ڤێ مەرەمێ ھاتیە دانان، سەرەرایی ڤێ چەندێ نوکە دوو پرۆژێن گەشتیاری یێن ل گوندێن رەشانکێ و بانیێ ژی ژ لایێ کەرتێ تایبەت ڤە دھێنە چێکرن کو مۆلەتێن وان دکەڤنن، بەلێ نوکە کار یێ تێدا دھێتەکرن".

مشیر محەمەدی دیار کر وان پێشنیار کریە کو ئەکوا پارکەک د ناڤ سکرێ دھۆکێ دا بۆ یاریێن ئاڤێ بھێتە چێکرن، ھەروەسا رێکەکا پێگوھۆڕ ژ گەرماڤا بۆ پیرۆمەرا بھێتە چێکرن و ھاتنوچۆن ل سەر سکرێ دھۆکێ بھێتە راوەستاندن و مفا ژ ئاڤا کبریتێ یا گوندێن گەرماڤا و بۆتیا بۆ گەشتوگۆزارا ساخلەمیێ بھێتە وەرگرتن و گۆت: "مە پێشنیارا ئاڤاکرنا نەخۆشحانەکا دلی ژی ل ناحیا زاویتە کریە کو ژ لایێ کەرتێ تایبەت ڤە بھێتە چێکرن".

ل دووماھیێ رێڤەبەرێ ناحیا زاویتە خویا کر کو د پلانا وان دایە کارگەھەکا عەلەفی ل ناحیا زاویتە بھێتە دانان، چونکو نوکە ٢٠ پرۆژێن ب خودانکرنا مریشکان ل ناحیا ناڤھاتی ھەنە و بەرھەمێ ڤان کارگەھان ل سەرانسەری ھەرێما کوردستانێ و عیراقێ دھێتە فرۆتن و گۆت: "نوکە سێ کۆمەلگەه و ٧٠ گوند ل سنوورێ ناحیا زاویتە ھەنە کو پتری ٤٠ ژ وان گوندان د ئاڤەدانن و خزمەتگۆزاری لێ ھەنە".

رێوار محەمەد رەشید