فەرمان دزەیی: چالاكییەكانمان وای كردووە خەڵك ھۆشیار ببێتەوە.. خەڵكێكی زۆر دراوە بە دادگا
ھەولێر-KDP.info- بەڕێوەبەری پۆلیسی دارستان و ژینگەی ھەولێر رایگەیاند، ئەمساڵ وەكو بەڕێوەبەرایەتیی پۆلیسی دارستان و ژینگەی ھەولێر، رێكارەكانمان زۆر توند كردوون، بە جۆرێك تیمەكانمان ٢٤سەعات لە ئەركدا بوون و خەڵكێكی زۆر دراون بە دادگا و سزا دراون.
عەقید فەرمان فازڵ ھادی دزەیی، بۆ ماڵپەڕی فەرمیی پارتی دیموكراتی كوردستان گوتی: "بەڕێوەبەرایەتییەكەی ئێمە چوار بەشی ھەیە، ئەوانیش لە شەقڵاوە و خەبات و دەشتی ھەولێر و كۆیەن و، كار و چالاكییەكانیشمان ئەمساڵ گەلێك زۆر بوون، كە یەكێك لەوانە بریتی بوو لە پاراستنی دارستانەكان، بۆ ئەوەی كەس نەتوانێ زیانیان پێ بگەیەنێت، ئەمە جگە لە پاراستنی ئاژەڵ و باڵندەكان، كە ھەر كەسێك راو بكات، دەستگیر دەكرێت، لەگەڵ پارێزگاریكردن لە بەنداوەكان، بۆیە ئەمساڵ بەراورد بە ساڵانی ڕابردوو رێكارەكانمان زۆر توند كردوون و ٢٤سەعات تیمەكانمان لە ئەركدا بوون و ئێشكگرییان كردووە".
دزەیی گوتیشی: "ھەر كەسێك زێدەڕۆیی بكات لە داربڕین یان زیانگەیاندن بە ئاژەڵەكان، دەستگیریان دەكەین و رادەستی دادگایان دەكەین، ئەمساڵیش خەڵكێكی زۆر دراوە بە دادگا و سزا دراون، ئەمەش وای كردووە خەڵك باش ھۆشیار ببێتەوە و ترسی لە ئەنجامدانی زێدەڕۆییكردن و سەرپێچیكردن ھەبێت".
ناوبراو ڕوونیشی كردەوە، ئەو كەسانەی سەرپێچی دەكەن ھەریەكەیان بە جۆرێك سزا دەدرێن، ئەویش لەسەر جۆری سەرپێچییەكە دەمێنێتەوە، جا سزاكە بە پارە یاخود بە زیندانی بێت.
عەقید فەرمان دەشڵێ: "بە هەموو جۆرێك رێگری لە راوكردن دەكەین و ئەگەر بزانین سەرپێچیكاران لە كاتی راوكردنیش نەگیراون، ھەفتانە تیمەكانمان دەچنە ناو مەیدانی باڵندەكان و لەوێ ئەوەی نەگیراوە، دەستگیریان دەكەین".
بەڕێوەبەری پۆلیسی دارستان و ژینگەی ھەولێر ئاماژەشی دا: "ئەو باڵندە و ئاژەڵە كێویانەی دەستیان بەسەردا دەگرین، لە دارستانەكان ئازادیان دەكەین".
بڵند ئیبراھیم
