پڕۆژەیاسای بودجە گەیشتە پەرلەمان و فراکسیۆنی پارتیش دەستپێشخەرییەکی ھەیە

بەغدا-KDP.info- جێگری سەرۆکی فراکسیۆنی پارتی دیموکراتی کوردستان لە ئەنجوومەنی نوێنەرانی عێراق رایگەیاند، ئەمڕۆ پڕۆژەیاسای بودجە گەیشتە پەرلەمان و فراکسیۆنی پارتیش دەستپێشخەرییەکی ئامادە کردووە، بۆ ئەوەی کورد ھەمووی پێکەوە لەبارەی پڕۆژەیاسای بودجەی گشتیی عێراقەوە یەکدەنگ بێت.

بەشار کیکی، بۆ ماڵپەڕی فەرمیی پارتی دیموکراتی کوردستان گوتی: "ئەمڕۆ پڕۆژەیاسای بودجەی گشتیی عێراق گەیشتووەتە پەرلەمانی عێراق و بڕیارە کە گەڕاینەوە بۆ پەرلەمان بۆ گفتوگۆی بودجە، سەرۆک فراکسیۆنە کوردییەکان لەگەڵ جێگری دووەمی سەرۆکی پەرلەمان کۆببینەوە و گفتوگۆ بکرێت، ئەمەش دەستپێشخەریی فراکسیۆنی پارتی دیموکراتی کوردستانە، بۆ ئەوەی بتوانین بودجە لە بەرژەوەندیی کورد تێپەڕێنین و لەبارەی بودجەوە یەکدەنگ و یەکھەڵوێست بین".

ناوبراو باسی لەوەش کرد:ٚ "راستە ئاسان نییە پڕۆژەیاسای بودجە تێپەڕێنین، بەڵام زەحمەتیش نییە و یەکدەنگیی کورد دەتوانێت زۆر شت بکات و بودجەکە تێپەڕێنێت، ھەموو ھەوڵێکیش دەدەین کە پشکی کورد لەناو بودجەدا جێگیر بکرێت لە کاتی پەسەندکردنیدا".

 

بڵند ئیبراھیم