رێڤەبەرەکێ گشتی ل دهۆکێ هاتە گوهۆڕین

دهۆک-KDP.info- د رێورەسمەکی دا ئەڤرۆ رۆژا 21/12/2020 ب ئامادەبوونا وەزیرێ رەوشەنبیری و لاوان یێ حکومەتا هەرێما کوردستانێ و پارێزگارێ دهۆکێ، (ئەمیر عەلی) وەکو رێڤەبەرێ نوی یێ رێڤەبەریا گشتی یا رەوشەنبیری و هونەری ل پارێزگەها دهۆکێ ل جهێ (ئەیوب رەمەزان) دەست بکاربوو.

د ڤان رێورەسمان دا د.عەلی تەتەر، پارێزگارێ دهۆکێ د پەیڤەکێ دا دیار کر کو بەری قەیرانا دارایی ب سەر هەرێما کوردستانێ دا بهێت رێڤەبەریا گشتی یا رەوشەنبیری و هونەری ل پارێزگەها دهۆکێ ئێک ژ رێڤەبەریێن ب بزاڤ و چالاکی بۆ نەبتنێ ل سەر ئاستێ پارێزگەها دهۆکێ، بەلکو ژ دەرڤەی پارێزگەهێ ژی کار و چالاکیێن وان دهاتنە دیتن و داهێنان د کارێ خوە دا دکر، هەروەسا دەست خۆشی ل رێڤەبەرێ بەرێ یێ رێڤەبەریا گشتی یا رەوشەنبیری و هونەری ل پارێزگەها دهۆکێ کر بۆ وی کارێ وی د سالێن بۆری دا ئەنجامدایی و داخوازا سەرکەفتنێ بۆ رێڤەبەرێ نوی یێ رێڤەبەریا ناڤهاتی خواست.

ئەیوب رەمەزان، رێڤەبەرێ بەرێ یێ رێڤەبەریا گشتی یا رەوشەنبیری و هونەری د پەیڤەکێ دا خویا کر کو ئەو یێ سەرفەرازە د سالێن بۆری دا وی ل گەل هەمی فەرمانبەرێن رێڤەبەریێ وەکو ئێک تیم کارکری و  گۆت: "بەری هەشت سالان د کۆمبوونا خۆ یا ئێکێ دا ل ڤێ رێڤەبەریێ مە هندەک ستراتیژیەت بۆ ڤێ رێڤەبەریێ دانان و ئەم شیایێن د دەمێ بۆری دا گەلەک ژ وان جێبەجێ بکەین و ئەوێن ئەم نەشیاین ژی ئەز پێشنیار دکەم رێڤەبەرێ نوی یێ ڤێ رێڤەبەریێ جێبەجێ بکەت".

ژ ئالیێ خوە ڤە ئەمیر عەلی، رێڤەبەرێ نوی یێ رێڤەبەریا گشتی یا رەوشەنبیری و هونەری ل پارێزگەها دهۆکێ ئاشکرا کر کو ئەو کەسێن د ناڤ بوارێ رەوشەنبیری و هونەری دا کاردکەن ژ هەموو کەسێن دی هەستیارتر و نازکترن و زووکا نەهامەتی و دەردەسەریان دزانن، ژ بەر ڤێ چەندێ ژی دەمێ دیاردەکا نەجوان د ناڤ جڤاکی دا دبینن بەری هەر کەسەکی وێ دیاردێ دەستنیشان دکەن و بزاڤێ دکەن ب رێیێن خوە چارەسەریێ ژی بۆ ببینن، لەوما ئەڤ کەس د جودانە د ناڤ جڤاکی دا  و پێدڤیە گەلەک پشتەڤانی لێ بهێتەکرن.

هەژی گۆتنێ یە کو پشتی ل رۆژا 1/9/2020 ئەنجومەنێ پارێزگەها دهۆکێ شەش بەربژێر بۆ پۆستێن شەش رێڤەبەریێن گشتی یێن پارێزگەها دهۆکێ پەسەندکرین هەتا نوکە هەر ئێک ژ رێڤەبەرێن گشتی یێن رێڤەبەریێن (چاندن، کارەب، ئەوقاف، رەوشەنبیری و هونەری، ساخلەمی) یێن پارێزگەها دهۆکێ هاتنە گوهۆڕین و ل رۆژێن داهاتی دێ رێڤەبەرێ نوی یێ رێڤەبەریا گشتی یا گەشت و گۆزارێ ژی ل پارێزگەها دهۆکێ دەست بکار بیت و ب ڤێ چەندێ دێ بەرنامێ گوهۆڕینا رێڤەبەرێن گشتی یێن پارێزگەها دهۆکێ د ڤێ قووناغێ دا ب دووماهی هێت.

رێوار محەمەد رەشید