"رێگای سەرەكیی ھەولێر.گۆپال دەكرێتەوە"

هەولێر-KDP.info- بڕیارە لە ناوەڕاستی مانگی داھاتوودا رێگای سەرەكیی ھەولێر- گۆپال، كە بە ئۆتۆبانی ھەولێر- دھۆك ناسراوە، بە ڕووی ھاووڵاتیاندا بكرێتەوە، سەرپەرشتیاری پڕۆژەكەش دەڵێ، پڕۆژەكە لە كۆتا رۆژەكانیدایە و تەنیا چەند كارێكی كەمی ماوە بۆ ئەوەی رادەستی حكوومەت بكرێت.

ئەندازیار غازی كاكل، سەرپەرشتیاری ئۆتۆبانی ھەولێر- دھۆك، بە ماڵپەڕی فەرمیی پارتی دیموكراتی كوردستانی راگەیاند: "رێگای سەرەكیی ھەولێر- دھۆك بە درێژی ٣٨ كلیۆمەتر لە سەنتەری شاری ھەولێر دەست پێدەكات بۆ پردی گۆپال و لە قۆناغی كۆتاییدایە، بڕیارە لە مانگی داھاتوودا بە یەكجاری بە ڕووی ھاووڵاتیاندا بكرێتەوە و پڕۆژەكە كۆتایی دێت".

سەرپەرشتیاری ئۆتۆبانی ھەولێر-دھۆك دەشڵێت: "پڕۆژەكە ٩٥%ی تەواو بووە و لە ئێستادا تیمەكانی كۆمپانیای جێبەجێكار سەرقاڵی ھێڵكاری و جوانكاری و تەواوكردنی تەنیشتەكانی ئۆتۆبانەكەن و لە ماویەكی نزیكدا ئەوانەش تەواو دەكرێن و كۆتایی بە دروستكردنی ھەردوو سایدی رێگاكە دێت".

لەبارەی وادەی كردنەوەی رێگاكەشەوە، ئەندازیار غازی كاكل ئاشكرای كرد: "كۆمپانیا دوای تەوابوونی بە یەكجاری رادەستی حكوومەتی دەكات بۆ كردنەوەی پڕۆژەكە و پێم وابێت ناوەڕاستی مانگی یەكی سەرەتای ساڵی نوێ رێوڕەسمی كردنەوەی رێگاكە بەڕێوە دەچێت، تەواوبوونیشی كاریگەری لەسەر كەرتی ھاتوچۆ دەبێت، بە تایبەتی كە رێگایەكی خێرای سەرەكییە لە ھەرێمی كوردستاندا".

قائید میرۆ